我最喜歡的日劇歌曲

其實以前都零零碎碎寫過，今次拎出嚟一次過呃一篇吧﹗哈哈﹗

(貼歌文是我的喜好﹗)

キャンバス 平井堅~《ハチミツとクローバー》(2008)

套劇不甚了了(甚至係悶)，但主題曲真的很不錯，貼劇集的題(畫布仲唔襯番劇中5個美大學生﹗)之餘又襯到個風格，淡淡然滲啲溫柔和暖意出嚟，襯埋劇中片段一齊睇即時覺得好睇咗(套劇…)，悲喜交集一閃即逝但又令人回味的大學生活本來就應該係咁架嘛﹗

另一首《瞳をとじて》也是本人最愛，不過係電影主題曲…真係傷感到呢…仲催淚過套戲。

ここにしか咲かない花 コブクロ~《瑠璃の島》(2005)

搵竹野內豐劇時無意中發現的劇(滄海遺珠﹗)，劇情和主題曲都溫情滿載，聽得個心好暖的。初聽コブクロ覺得佢地把聲和啲曲風都幾似Mr. Children(勿打我…嗚…)的，孩子先生啲歌又係好正面，激勵人心架嘛…不過近期既《Hanabi》我麻麻地，聽嚟聽地都係好耐之前既《Hero》和《Tomorrow never know》。

BTW，我覺得桑田佳祐的《明日晴れるかな》都係呢種曲風~

Your eyes only ～曖昧な僕の輪郭～ EXILE~《できちゃった結婚》(2001)

某次行唱片店見到有台版老翻碟…有竹野內豐喎﹗廣末涼子也好啫，貪得意買番屋企睇，套劇人腳都係我飛佛(仲有妻夫木聰和阿部寬，不過佢兩個係配角)，個故事又輕鬆惹笑兼感人，首插曲又好好聽喎﹗當然，最好係happy ending嘛﹗(最後一集廣末生bb時我睇到喊架…囧)

其實此劇的主題曲係hitomi既《IS IT YOU》，都唔錯架，不過我不太喜歡她的嗌歌聲線。

很喜歡Exile主音的嗓子…據說…佢好似離咗隊…之後又唔知入過幾多個新成員…而最近佢又好似回歸番…errrrr…即係點呀？BTW，Exile前陣子聖誕翻唱聖誕必聽到路的《Last Christmas》…好好un…好好feel~(其實我未嘔架，好歌不厭百回聽﹗)

もう君以外愛せない KinKi Kids~《天使が消えた街》(2001)

其實這是私心之選﹗卡卡…以歌論歌呢，我更喜歡《薄菏キャンディー》、《To Heart》和《夏の王樣》，《夏》曲來自既《Summer Snow》片頭音曲(都係叫《Summer Snow》(SISSEL featuring ZAMFIR)更係好聽到不得了…不過…王子大人這部劇情老土到不堪的係我第一部睇到中晒招架嘛，有紀念價值呀﹗

另，聽完李彩rain小姐的極度恐怖改編版(最恐怖係啲詞﹗)，聽番原版真係好聽(舒服)好多…金記唔好亂改人啲歌啦…囧

另外的一篇：《39》@Kinki Kids 10年之大成

First Love 宇多田ヒカル~《魔女の條件》(1999)

其實我到而家都無睇過呢套日劇(菜菜子老公既成名作《GTO》我都無睇過…哈哈…)，但首主題曲就一聽著迷，仲癲到走晒去買光妹第一隻碟，唔識日文，但KTV有羅馬拼音，咪一班人跟住EE哦哦的唱囉~

Can you celebrate 安室奈美恵~《バ-ジンロ-ド》(1997)

我記得這部劇喺無記六點半新聞前時段無聲無色咁播過，睇咗一兩集覺得唔好睇無繼續追，當然我鐘意首歌都唔關套劇事。本來係講劇中女角結婚生小孩既故事，後來反而變咗主唱歌者既主題曲，係咪人生如戲，戲如人生呢~(上面post係98年紅白安室復出再唱多次呢首歌((22/11/11後按：搵唔到條片了﹗))，唱到尾安室喊到阿媽都唔認得，Max和和田大姐一齊上去抱抱佢…好warm呢﹗)

LA・LA・LALOVE SONG 久保田利伸 ~ 《ロングバケーション》(1996)

我的頭號no.1日劇至愛，癲到百四蚊走去買隻台版(唔知係咪正版)OST來煲(又真係好多好歌…)，梗係點都要搵番原來片頭來回味吓，由第一粒音響起已經想跟住un~(謎之聲：你也太誇張了…)。又講，久保田利伸…咁多年我只聽佢呢首…哈。

ラブ・ストーリーは突然に 小田和正 ~《東京ラブスト-リ-》(1991)

劇我是後來(aka近年)先偶爾喺有記睇番，但這首歌就一早識…因為…伊麵哥哥改咗做《二十世紀的戀人們》﹗喂，我覺得個melody很有型，好modern既感覺喎﹗至於以前無電腦的我點解會識原裝日文版已無從考究，點解又會愛屋及烏埋也無從知曉…

又是一個愛屋及烏，近年小田大哥除了自己唱吓主題曲(《First Kiss》…不甚了了…看了一集就睇不下去…)，另外仲有為龜梨和也套《たったひとつの恋》(2006)寫了主題曲《僕らの街て》，套劇其實係娘到喊的(但我莫名其妙地喜歡…)，首歌呢…主打係小田和正作既，愛屋及烏。越聽越似《ラブ・ストーリーは突然に》撈埋《酒紅色的心》(安全地帶？﹗)…

Say Yes CHAGE AND ASKA~《101回目のプロポ-ズ》(1991)

真係要掩面哭逃，這部傳說中既經典我都係無睇過架﹗(XDDDD…)但首歌聽得很感動，101次求婚喎，聽首歌大概都感受到劇中男主角既鍥而不捨(當然，個女仔buy唔buy係另一回事…)，每一次聽都覺得很感動的…

而家睇番MV入面飛鳥涼個造型覺得好得意，好似睇緊《日本風情畫》咁呀﹗(9字頭呢幾首選擇好鬼《情迷日劇》精選碟feel，不過那時細個無乜睇過幾多部，係電視/收音機會播既先識，咪數嚟數去都係呢幾首…無計啦…)

永遠相信 翁倩玉~《阿信的故事》(1984)

作為最後一首梗係要整首勁既出嚟﹗《阿信》當年我和娘睇到淚水鼻水乜都喊晒出嚟，特別係二女(阿愛定阿貞？)出世無耐就夭折，阿信奶奶竟然要佢喂大嫂個仔﹗﹗﹗(大嫂好似係好人嚟的…)…慘無人道呀﹗之後養女初子一心同大仔阿雄一齊…點知佢二戰時死咗﹗(嗚嗚嗚…)…打完仗諗住可以過番啲好日子啦…點知老公龍三剖腹自盡﹗(嗚嗚嗚嗚嗚…)…好慘呀…

記得最初喺無記睇時係廣東歌主題曲《信》，後來亞記播時就用咗國語版《永遠相信》…我鐘意國語版啊﹗不過就梗係廣東版「命運是隻狗，永不吃骨頭」深入民心…

講開又講，翁倩玉我最飛佛其實係《魅せられて》，睇埋佢身上那件長裙子擺呀擺，幾高貴華麗啊~~~Wind is blowing from the Aegean...(我是從這首歌學識愛琴海的英文…哈)

*****************************************************
以上~