深夜驚魂之幼稚園

以下為一百巴仙真人真事，為保護當事人將真名改為假名：

返了整日的工，上了三個鐘頭的課，累透的本人下車後只望速速歸家沐浴更衣會周公。半路中途又見到前晚遇到的那個man…又係不停「回望」本人…時為夜深，本人腦中只浮出一個驚字，走為上策﹗

本人開turbo時，這man竟然同時俾油從後追趕；大事不妙，唔係咁好彩呀話？本人於是故意行開啲，將二人之間距離擴大，意圖逃出該man十步範圍之內…

本人成功了﹗該man已走在本人斜前面，心諗應該無事的時候該man突然dup停，死啦﹗我應該拎電話出求救定拎技原子筆出呢「桶」佢呢…

此時，這man竟然開口向本人說話…

「你係堂本冰子呀呵？我係你幼稚園和小學同學竹野內豐(哈，除了光一之外本人極欣賞日本型男之一，借個名呢用一下)呀…」

這man講得出我的名字(仲要係中文全名﹗)、學校名和我媽媽曾經打工搵外快的地方，證實他確認識我，此舉純為與老同學相認。基於本人驚魂未定，二來本人完全唔記得呢位同學的名字(我連大學同學都唔記得，點會記得幼稚園同學﹗)，自己完全未及反應。而呢位同學仔睇呢係比我個驚樣嚇親，閒聊了幾句就說再見。到本人元神歸位想話交換個msn為時已晚了。

本人記樣及不上記娛樂新聞之萬一，認樣能力堪稱水皮，基本上升了班就唔記得上年既同學名(繼續同班的除外)。莫講話幼稚園(同學仔話二十幾年我唔記得唔出奇，唏，我輩乃足三歲才能讀幼稚園的一群，無三不成幾，現在還沒有二十幾年 ﹗)，大學同學係街度見到我都未必認得。今晚無啦啦遇到廿X(絕對未有幾﹗)年前舊同學乙件，驚的反應太大，弄得同學仔相認得有點尷尬(也可見他好奇心之大，死都要確認吓有無認錯本人)，而家諗番都有點唔好意思…

係街上被舊同學認出已唔係第一次。預科study leave時我在巴士站等車，突然有個man(我有少少懷疑係今天我遇到的這個man…)拍我膊頭說是我同學仔，佢又講得出我叫甚麼名字，又認得我媽媽是誰，又講得出我住那兒﹗當然，我又係茫茫然不知所措，我中學頭五年在師姑庵渡過，預科雖然身處男女校，但仍然陰盛陽衰(鬼叫我讀文科)，尤如讀女校咁…何來有個咁既樣的同學？諗極都諗唔到眼前的man是誰是他說是我的幼稚園同學﹗天呀，我連我高班讀甲乙丙班都唔記得…何況係幼稚園…

諗諗吓，雖然本人讀過小學和幼稚園各兩間，但到現在仍保持聯絡的…應該只有一個，而這位同學仔除了是本人幼稚園、小學校友，更是街坊還做了兩次中學同學 (都係不幸升唔番原校的一群)；說來奇怪，中學時我們各有各的老死，現在竟然是聯絡得最密的中學校友。從她口中，我先知原來幼稚園因為佢曾經打我尖而狂喊，呢個惡死小朋友仲夠膽話「唔准喊」﹗不過唔知佢記唔記得，小學時我曾經老點她說"welcome"的串法和「惠X超級市場」的"wellcome"是 一樣，令她默書錯了字，失卻了一次一百分呢？哈哈，人與人之間緣份既野真係好奇妙。

返了兩堂就撞到呢位同學仔兩次，我諗佢係返輪班的工，下次再遇到一定要問佢有無msn先﹗

另一篇：認人
-------------------------------------------------------------------------------
題外話，之前Penny寫了篇陳奕迅歌曲選(二) ，本人身為華星年代陳醫生粉(只限華星年代的醫生)二話不說留了個言。留言中提到醫生debut大碟中一cut滄海遺珠中的遺珠--和千fa合唱的《其實我記得》，乃係醫生少有男女對唱，亦為《陳奕迅》一碟中本人心水。今天看報紙說醫生在嚟緊的拉闊十周年Live會邀請千fa一齊唱番呢首「無出過卡拉ok和走走地音」的滄海遺珠﹗歌者和我的品味相同，一股共鳴的感覺湧上心頭…好感動呀…

如果郭先生再次公開表演我小時聽爆機的至愛《雨中感嘆號》(9/3/12後按：呢，呢篇《郭富城陳年MV特集》好似無貼呢首金曲喎﹗)，我諗我會一路聽一路感動到喊，仲要喊到收唔聲…