往外闖

不是我，我闖過，上年回到舊司了。

我是想分享身邊兩位新舊同同的故事啫。
(btw，若干年前的今天是我在現司last day…哈哈)

舊文說過的後輩和另一個同期，上年我回巢之前剛好跳船，半公半私的搵佢地求救又順手吹吓水，知道佢地轉到自己心儀的行業，做得好唔好就唔知，不過喺呢度練成既一身武功都用得著，幾好呀呵。

呢種心情我好明，公司好穩定，是好事。但職未必咁易有得升(我司的title是很緊的…不像美式銀行阿茂都係AM的說)，工作範疇也因業務關係唔係天天新款，即是每年重覆又重覆。佢地攪了好幾年(我都係)，終於下定決心離開，我好明，因為我當年都係。在老闆的祝福下離開，keep住良好關係，其實係好美滿。

(所以說我不能在日本打工囉…哈)um，其實我一點也不aggressive，我不想知同輩們現下搵幾多錢做到有幾高人工，總之工作內容我可以發揮所長，人工又ok俾我養家讀書去旅行，我就滿足的了。當年工作去到樽頸，猶疑了好幾年，還是決定出去望吓個世界(雖然跳了入火坑，眼界大開)。走了一轉就知道呢個世界無完美，當眼下的各個範疇都ok，就ok啦，不要太貪心啦。

呢種想走又唔想走的心情，應該好多人都會呀呵？

雖然說好馬不吃回頭草，但有另一句好漢不吃眼前虧…當我真係頂唔順個火坑時，真係無理同自己過唔去吧…

是咁的，現司有位做了十多年的同同要走。十多年喎﹗小道說佢係因為被照肺了一大餐才憤而唔撈，佢本人說想出去望吓個世界，咁雖然驚訝(通常過咗一定年紀我地expect佢唔會走的嘛…)…咁，um，睇娛樂新聞好多TBB藝員做了十幾廿年都出去闖，出面風大雨大喎…但人生在世總係想睇多啲學多啲，咁我地唯有送上祝福啦。

然後在火坑司時有位畢業幾年的後輩，未夠30，未有家庭負擔，沒有grant loan，屬賺錢買花戴類，現時狀況是職不會有得升，公司如無意外會每年加幾個百份點人工(高於市場既…肯定)，負責的是team裡前輩案子內漏出來的東東，operational的，不是自己plan。是…team內毫無疑問的在下位者…，在我和另一個同期(都跳出火坑了…)眼裡都是應該跳出去看看的時候，因為…新入職的fresh grad人工跟佢不相上下了(學歷一樣係大畢)，雖然說現下佢無經濟負擔，不過過幾年既野無人知，或者佢自己結婚生仔，或者父母退下來要供養，或者失驚無神想去買樓…一千萬個或者。現下工作無乜前景，唔趁而家跳一跳唔通第時有上述需要先跳…

不過跟當事人詳談過後，雖然對現時工作有點(係有點…)灰心，但卻無去意…因為…佢好怕出面世界風大雨大…要不就係跳來我地的司…有熟人帶路嘛。聽得我和同期都滴出一滴大汗。咁子非魚安知魚之樂，在我地旁觀者覺得梗係跳出去轉一轉身加吓人工擴大吓個job duty梗係好啲時，原來當事人唔想冒得到更差情況的險，那沒，沒事了。

萬事有得揀的話，就無得怪人，只有第時唔好怨。就如當年我跳了去火坑，遇上奇人奇事，好掛住舊司時亦無計，一係繼續等到過試用…一係閃…係自己揀無得怨人。

人各有志，我們還是轉話題講番旅行算了。不過…加咗啲人工可以坐啲舒服啲有飛機餐有野飲的airline唔好咩？well…當事人說搭Peach凌晨機也不錯時…咁我地就唔出聲算了…