名校

9月小的會重拾學生身份(有咩？一路都係呀)。是咁的，一直腦交戰(其實也沒有太多)心儀(x年)的隧道大和遠到媽媽都唔認得的郊大之間，郊大收咗而隧道大一直無回音。但去完兩家學校的information seminar(當年A-Level我好勇地一個都無去的時候現在我乖豬地去聽吓了)後，多年情意結還是敵不過眼前穩重可靠的programme leader(加上佢那句「咱們係同類course學費最抵的)，收到offer，很自然就register。當年，是呢頭收offer嗰頭就去reg再被踢入o camp和入英文班，今回相隔了四五個月…好漫長啊…

um，其實對於郊大除了遠我無乜特別感覺，但我的親戚一個二個的反應是「好勁啊﹗」囧咗。呀，係喎，那家是郊大…我…入咗間名校？

當下我無講啲乜，第一個反應是postgraduate係搵錢野…咁我合乎佢入學條件，篇personal statement寫得正正常常，剩下就係睇校方收唔收架啦。(<--毫不在乎…型咗？)

再想一想，我讀過的兩家幼稚園…是街坊店號。小學，um，在區內ok但成個港島應該係名不經傳。中學，頭一家是同教會內的包尾(XD)((都係區內ok那種啦))，高考那家就唔好講啦，補習先係正式上堂既。then大學，偉大的商大喺我讀既年代，吾系programme leader都落力攪好多形象工程，為個系好(佢title好？)定係為我地前途都好，其實學到既野理論係少，但attitude和mindset上係到而家都受用，我諗我地有個正面態度同靈活思考，總好過畢業n年仲喺度4P analysis掛？不過畢業初期去見工，仲有好多老細鐘意俾說話我聽…我俾機會你架咋…唔係三大我唔in架(咁你又叫我嚟in…車)…

當然，最後無請到。然而佢係咁睇唔起商大生既話，請咗都怕且做唔長。

原來，我唔覺意入咗間名校，原來，啲親戚係真係會覺得我勁架喎。仲勁過A-Level成功殺出重圍成功爭取學士學位乙個(我個人覺得係N1之外另一個可一不可再的小宇宙爆點)

雖然說一路都無乜讀過名校，但其實小的小學同中學都係第一志願，大學係第三，都不賴吧。雖然小的中學係Band 2頭(好似說偶然試過上咗Band 1尾)，咁我又覺得無乜野，中一至中三係快快樂樂玩住讀書，中四中五老師就谷得勁啲，咁我玩住讀得嚟成績叫做中中間間交到功課，班我升到大學又入到，雖然那時打的底唔多好出咗嚟做野跟洋人老細先叫英文似番啲樣，但…開心好緊要啊(唔係邊有咁多電視懷舊文可以寫…)

好多時我都慶幸自己父母唔逼住要「嬴在起跑線」…唔係就死得啦…我而家一把年紀先入到名校喎…

我啲親戚俾我更感覺良好到底是怎麼回事了？