沒有網上的日子之一~聽歌篇

是咁的，突然好想回味吓以前沒有/初初上網的日子，年紀輕的小朋友會唔會覺得我講緊鬼故？﹗哈哈

有幾耐無聽過CD盒帶現已上市？﹗呀﹗

我是剛剛…哈。話說mp3 loop到王菲94年演唱會live，佢當年係會喺歌與歌之間講野，仲會叫人買佢隻新碟添﹗講完就加了一句「CD盒帶現已上市」，登時無限思潮起伏。94年，已經離我很遠啦…

由黑膠到卡式帶到CD到MD到MP3

原來我經歷過咁多種format﹗

舊文說過我屋企沒有黑膠唱機的，但我姨屋企有，小時又娘又常帶我地回佢娘家玩的嘛，於是經常有機會接觸黑膠。當年姨姨們乃係標準歌迷，很多(係很多﹗)歌手一出碟就抱唱片回家，於是每次回家我會得到很多由唱片dup出嚟的帶回家。係啦，我屋企印象中係無出現過hi-fi，只係得聽到收音機和帶的小機，係可以dup收音機或聽你講野既，小時亂咁拎部機嚟玩逐個掣按於是dup咗好多我既怪叫落張學友、倫伯或梅姐的歌聲度…囧。於是，我從小就懂錄音掣點用，同埋，真正愛惜的帶係要挑咗頂頭粒膠，於是就唔會dup到。

一路我都未買過正版(dub歌是很有樂趣…但是盜版的行為…哈哈)，直到郭城城《跳不完愛不完唱不完》才買了(當然係大人買俾我既)第一餅正版盒帶，才知道帶跟黑膠一樣都分A、B面，而且每邊頂多得五、六首歌，好快就聽完。而小時候的我聽既walkman(<--我娘又真係幾豪氣，初小的小學生已經有部幾百蚊的walkman)唔識自動反帶，所以好煩…。

呀，除了郭城城，我仲lur大人買過軟硬天師《廣播道fans殺人事件》，最後一餅係周華健既《緣途有你》定郭城城《狂野之城》呢？那時屋企有CD機的了，不過我唔夠零用錢去咗買平啲既帶。

CD呢，自從某年終於lur到娘買一部有齊CD/帶/收音機，帶是兩格(即係可以帶過帶)，仲會自動反帶，錄CD和帶都無限方便…的hi-fi之後簡直係不歸路的開始。除了自己慳住用零用錢去買碟，仲會同同學組成最強share碟網，大家熟知大家的偶像，買咗就返交換互dub(我知係唔合法既)，或者dub一餅俾你返屋企慢慢聽。因為帶唔可以好似CD咁揀cut，又唔可以快播(會好損磁帶架嘛)，dub歌最痛苦但又開心既就係返屋企拆封袋，放CD入機逐cut聽，對住歌詞書仔揀邊首要dub(有時仲會好認真寫筆記﹗不過當年未有blog…啲筆記就係返學校同同學分享囉…)，揀好就錄，因為唔飛得於是要由頭聽到尾，每每要錄好耐，有時插住headphone就行開，但屋企人唔知轉咗去聽收音機就…囧。所以要死守住部機，做功課溫書都同部機同在。好囧。

到MD年代dub歌過程大同小異，不過好一點既係錄咗出嚟既歌可以好似CD咁飛，同埋部有MD的機放房，終於可以有個私人聽歌既空間囉~~~其實我係幾enjoy，初初仲特登買部可以駁線落hi-fi錄番帶的手提MD機出街聽同喺屋企過番啲聽咗幾千年既帶，backup嘛，估唔到MD比帶和CD都更快摺埋啫。

我記得我第一條MP3係三叔(竟然﹗)128定64mb，細到無朋友，得十零首歌可以放入去。而我就說我搭車一定要聽歌，所以dub帶都好少dub 60分鐘(係成日都係聽120﹗哈)，十零首歌？唔係fa…當然，好快啲容量越出越大，而家喺手提都可以放晒我啲珍藏落去了…

手提聽歌裝置

情懷之一，係以前聽walkman時帶係有時間限制，60、90、120分鐘，我個人好貪心係死都要錄120，咁樣就可以放最多既精選入去(雖然音質係差啲…)。um，我知dub歌真係唔啱既…哈。不過當年dub歌時要諗錄新歌定舊歌…新碟的話剩咗既時間錄邊首好呢？因為餅帶唔會話你知剩幾多分鐘，只能從大數除二每邊分鐘再減我錄咗幾多首歌嚟估剩番幾多時間，然後塞首差唔多的，希望唔好自動反帶後再錄等兩句…囧。除了自動反帶，我最豪的一部walkman係headphone有遙控架﹗﹗﹗﹗﹗﹗無既話，聽、停都要拎部機出嚟撳係幾煩，缺了自動反帶又要成日拎部機出嚟轉帶，好唔型。雖然當年我返學其實幾個字…唔聽得好多歌。

後來我有過discman，其實我想知點解有得dub帶和MD，但無得dub CD…要聽就只有成隻碟聽，但一隻碟只有十(鬆)首歌，仲要唔係首首我都鐘意架嘛，好煩…我記得去北京旅行時，張震嶽的《這個下午很無聊》被我聽了一億五千幾萬次，就因為我唔記得定多幾隻碟去替換…囧。同樣，比起最初只係齋play的爛鬼discman，我最後的一部係索記出品(當年仲未八字唔夾…哈)，headphone係有screen display你聽緊乜歌，睇到有乜野function緊(即係音色都可以喺remote度選)…係幾強大和方便，而且仲有避震﹗係避震﹗當年我覺得好高科技…哈哈哈。好多時我為了聽歌…係特登同同學分開行…獨自一人塞住隻耳享受一個人的孤獨…然後自覺很有型。

MD年代除了上述的錄音功能就係聽歌囉，無乜特別。MP3就變得太快啦…好囧。十多年來都唔知換過幾多部。為了backup某年我好神心地將屋企既CD都rip晒做MP3…卒之儲了成廿激歌…然後MP3機/電話容量唔夠又唔開心(其實我唔會首首歌聽囉…好多N個live加cd版…又是一個囧)…卒之，明明用電話聽係ok既，我走咗去買部ipod嚟聽…哈。

講開，應該04、05年時金牌和avex成日出copy control CD…令我極度無奈…睇番書(《1998年的宇多田光》，很不錯)話呢個技術係當年日本唱片界應對盜版，真係control度呀…然後我買了正版但放唔到入mp3機…滴出一滴大汗。

Dub歌的藝術

Dub歌(雖然係唔啱既…)係一門藝術，除了時間的控制，類別(新歌？精選？某人特集？某theme特集？)的選擇，盒面歌名的編排，挑唔挑舊防錄膠，用邊隻時間長度的帶，好多野要考量。Dub之前，最後用洗機帶洗一洗部機令磁頭清潔(雖然我唔知有無用…)，就算部機有快逐dub功能都唔好用，成日食帶，食的時候就算使出用鉛筆卷番埋，皺咗既磁帶啲聲多多少少都怪異咗…嗚…

租/借/買碟

屋企附近高峰時有三四家CD店，後來有啲連埋VCD一齊賣，總之放學返屋企前去望一望有乜新野是常識(無網上無咁快收到資訊嘛，係靠報紙雜誌電視電台同…親身望﹗)。因為同學網好完善，除了自己本命的會一定買，其他大部份都可以借回來…所以好少要去HMV試聽…then二手呢，我是入u後先多看信和或298的二手店…好多時都係以前啲帶花咗聽唔到，咁就想搵番隻舊碟嚟聽，順手發掘吓隻碟有乜滄海遺珠。但在呢個前提下rip的mp3…總係有好多以第一次覺得不錯，之後好想飛同完全唔理解做乜keep落電腦的歌…雞肋…囧…

反之，無啦啦發現啲好好聽既係好驚喜好開心既。

信和、集成、圖書館

信和同集成係買碟(也試過賣碟…一棟先收廿蚊…囧咗…中學時好鐘意為一隻覺得好聽的歌就走去買一隻碟架嘛﹗)好地方，其實仲有一個寶藏係圖書館…係…政府的圖書館。細個時有好齊的流行歌手帶，我好多張學友和梅姐係借帶返嚟聽…但因為唔知有幾多人聽過…每次放入機都好驚會喺我手上聽斷…然後要賠…

CD呢，不消說，多到無朋友。雖然要花啲時間搵既。港台都有而且係連演唱會版都超齊，真係好邪惡。最恐怖係咩呀，日文CD都有呀﹗(雖然唔齊)…我記得步姐初初紅時我係喺圖書館借佢隻《Loveappear》架…。當年無網上就只有行入去搵，後來可以喺屋企check定再預約去附近的拎，真係邪惡到無朋友…

不過而家沒太多閒情去搵歌…買的碟，都只係本命而已。是有一點失落，但屋企堆了太多碟…唔好再塞啦~~~~~

關於好有情懷但未必能聽到的3吋single：曾經，我是這樣聽歌的…
太多了不能盡錄：CD雜談

再續。