[港劇]《魚躍在花見》~熟齡版《將太的壽司》

既然人人都話似，咁小的本著以身掃雷的精神去掃一掃囉…果然唔睇唔知身體好，um…都有一樣係唔似既，除了日本無laughing哥演出外，就係…《魚躍》是熟齡版囉…

先承認，小的n年前的暑假睇過一次《將太》後就無再翻煲過，唔係搵番劇情資料都唔記得原來廣末涼粉劇中演柏原崇個妹﹗(我成日以為佢跑龍套做配角的只有《長假》添﹗)…呃，其實我係有碟既…係咪應該拎番出嚟睇呢…

咁劇情上網上都有好多文章做過對比(如這篇或大典中所載)，咁小的就不作重覆，細節唔記得啦，但個setting：總係有個死奸鬼不擇手段去害主角，而主角本身係好有能力但又無乜自信，總係退退讓讓咁，到後來臨界點爆發，佢不得不發揮佢既小宇宙，就算身邊客觀環境唔夠好都可以出奇制勝，少不免身邊梗係有個世外高人教路，又同時有個紅顏知己咁…呢個時候總會有個人喺男主角身邊本來係friend的又因為佢發揮小宇宙而妒忌佢，但後來被男主角的真誠感動就回頭是岸…最後梗係男主角乜都嬴晒，友情親情事業乜都齊，完。

真係齊晒架《魚躍》個故仔，仲加多樣爭產、身世之謎和失憶(呢個無記最鐘意﹗)添﹗嘩哈哈。well，個故仔又唔能夠話佢唔好睇，不過有啲難受係兩位男主角都比較成熟，despite佢地保養得唔錯，特別係chilam哥哥個角色，比10年前《十月初五》的初哥哥更0靚仔﹗囧﹗…唔知仲以為我睇緊台灣偶像劇…chilam哥哥跟囧囧談情比蒸餾水更純的愛情…呃…呢套劇係咪遲咗10年先俾佢地拍呢？仲童話過《衝上雲霄》囉…或許唔係演員既錯，佢地都做得好落力…不過係時間既錯囉…(兩個女既都過3字啦…男既仲要係當年將太既double啊﹗)

感情線設定好鬼有《射鵰》靖蓉純情，楊康和念慈就愛恨交纏(其實《潛行》都係咁啦…)既感覺，嬴仔(chilam哥哥)和孖羌(囧囧)走純情路線時，囂哥和思籠就走愛恨交纏路線，前者讓我覺得成件事很超齡，後者很剎有介事…兩個成日一行出嚟就滿懷心事咁…黑面黑到好似好多人殺咗佢地全家咁，跟住兩個都成鬼日報仇報仇報仇…囧

睇文說百目魚神慕容澄(松哥)係抄《將太》入面個高人，咁張國強演的唐公子係咪抄李純思呢？一樣都係一條二條白色highlight喎﹗講開造型，兩位女主角個妝真係厚到無朋友…特別係隻眼…很可怕…有必要連瞓覺都smoky eye嗎？還是根本連妝都唔換接住拍就算呢…囧﹗

日食店係咪真係要叫番日食既日文呢？(其實個劇名都有點造作…)一路睇住劇中人喪up魚既日文名…我就諗係咪真係有咁多人識…同埋劇中「月瀧沙」和「意壽司」除了壽司bar枱外，店裡的坐椅擺設鬼咁foodcourt既，又話高級壽司店？﹗(通常去親啲壽司店都多係木造家俱的嘛…)…喺懶營造日本feel的時候有啲咁唔日本既場景感覺真係好詭異…。um…於是有番日系feel裝修的店…咪就係力奇桑旗下啲店囉…係呀，就係兩家壽司店無出現，烏冬和咖啡都出晒鏡…連佢鐘意投的日本一藍鯨都出埋，真係唔講都知係佢史邦沙囉…

唔能夠話套劇唔好睇，但實在個設定係咪設定得男角太後生呢？疑問：15年前魚輝煌叫兩兄弟比試時，chilam哥哥和laughing哥都無搵年青人做替身喎﹗(有k4可以用丫…)，15年後…佢地仲唔住三望四…三弟魚至寶都28啦……阿嬴哥仔仲可以0靚仔過佢…真神奇… 以上。

****************************************************
《魚躍》@tbb主頁
《將太的壽司》相關文章：1/2