《十萬火急》~暨消防員電影/片集雜談

很奇怪，有啲戲係電視一播，明明已經睇過十幾廿萬次，每個情節都已睇得滾瓜爛熟，無論開機時片子已經播了幾多，還是會忍不住睇的(例子：周星星90年代的電影)。

應該是前兩年，第一次在電影台睇到《十萬火急》，有理由相信有記係襯隔離台播緊《烈火雄心3》同埋黃浩然先生冒起而播一播的。唔睇尤自可，一睇…我個「一播就忍不住會坐低睇」電影list又多一部了﹗

(數數吓真係越數越多，周星星、《新紮師妹》((第一集))、《古惑仔》((除了最後那集))、《衝鋒隊之怒火街頭》((個人最愛這部的劉青雲))…囧﹗都說成個有記我最鐘意睇係電影台架啦﹗)

話說前兩晚閒著在家，食飯時就開電影台嚟睇…一開已經中段…又忍不住坐低睇，跟住跟友人講開…原來呢套都係大家「一播就忍不住坐低睇」list之選啊﹗

基於我係前兩年先第一次睇，好多野都好新奇…好年青的黃浩然啊(據說係佢入行第一部片﹗)，好耐無見的李若彤和黃卓菱，很少在電影見到佢地既十郎巴斯光年和陳啟泰﹗﹗﹗﹗仲有我好懷念的皇冠﹗睇一睇番資料，原來係臨回歸前拍的，96年。《烈火雄心》第一輯98年，回咗歸了。不得不提我最欣賞既劉松仁，繼《飛虎雄心2之傲氣比天高》(是男人~~~~~呢套我都好鐘意睇架﹗哈哈)後松哥再演紀律部隊高層，好型，結尾佢in charge荃灣紗廠火災時行事果斷，關心和信任伙記，好有氣勢…啊…但佢唔係主角喎…哈哈哈…

總要有幅圖係啲消防員一字排開咁先有氣勢嘛﹗呵呵…忍不住要貼一貼…(咦，《烈火1》都有山泥傾瀉場面喎﹗)

(好…嚟番我最鐘意的point form)

• 劉青雲哥哥都做過好多紀律部隊…(我愛《人在邊緣》做懲教處…和《衝鋒隊》、《暗戰》做差人呢﹗)，不過唔知係咪佢個樣關係呢，好似硬專做啲有點硬頸，口硬心軟，鐘意同上司頂咀但最後又會同佢和解，包容關照啲細既角色呢？(不過初出學堂，有個咁肯教野既大佬又真係好開心喎﹗)佢呢個三柴角色，同《烈火雄心》啲柴係同出一徹的…
• 方中sir個角色係勁似《烈火2》既囉，又係對下屬要求好高，一嚟就令到伙記不滿，跟住當然係娘爆地一齊出生入死後，阿sir睇到下屬的好處，下屬又見識阿sir既厲害，咪團結就是力量咁囉…
• 阿madam黃卓菱好耐無見喎﹗想問佢有咗仲出入火場唔驚個胎有事咩？另，係咪因為呢套戲有個madam所以《烈火1》也搵打女梁琤來穿插一番呢？(原來98年黃係憑呢套戲提名最佳新演員…)
• 阿madam老公…係十郎﹗我成日覺得佢係王敏德之後另一個最有說服力去演飛虎隊(教頭)的人…不過我唔記得部戲有無mention佢係乜職業…
• 很爆笑是有一場阿madam救了bb出嚟但送去醫院就不治了，madam一返屋企就撲向沖緊涼的十郎度喊住話要個bb…但阿老公十郎係沖緊涼…啲水係咁流向佢塊面度，又要做表情，又要講野，又要被水fing，真係演技既挑戰…。
• 啲隊員我淨係記得黃浩然…佢個角色名都好似係叫黃浩然的﹗對咗佢而家個樣成年，睇番咁fresh既(前一陣子我又唔覺意lap到《孤男寡女》…Roger﹗)忽然好唔慣添…
• 一開始話阿慈雲山消防局成條team成飯成到肚痛入醫院，跟住黑仔事連連，從此佢地稱為黑仔隊，連啲大粒阿sir都approve埋呢個term…哈哈…
• 我想問慈雲山點解帽上面係cwb？bug呀﹗(睇劇睇上癮了…)《烈火1》阿佑佢地都係慈雲山架喎…我係咪應該返去睇吓係咪應該唔係cwb呢…篤…
• 睇番個故事都幾寫實，講完工作上既野之後就係每個人生活上的點滴，以電影嚟講都幾少有，通常電影都要煽一煽情架嘛﹗(反而無隊員死喎﹗)《烈火1》都係走呢條路線(當然愛情是比較多和煩啲的)…去到第2輯都仲可以…但去到第3輯完全係談談情先去救救火…好煩…
• 啊…阿李若彤呀﹗演佢男友既竟然係陳啟泰﹗都好似好少見佢拍戲喎﹗oh…(看的時候我是在想…撞鬼囉…姑姑和尹志平耶…)
• 講開松哥又講多句，佢喺《飛虎雄心之傲氣比天高》(很傲氣的名字，但內容卻是一點都不傲氣的…)係做警察的高層(係咪教官呢？都唔記得了)，有兒子陳小東和失散了的兒子張智霖，弄得我呢水睇《魚躍在花見》時不停諗起呢套戲…講起又有點想重溫啊…
• 行外人的無聊題外話：其實喺火場時得so/sso有walkie，咁啲細既無，火場唔係吓吓靜應應聽到隊長既指令架嘛，如果嘈起上嚟佢地聽唔到點算呀？﹗睇戲佢地係聽隊長大叫做野架喎…
• 最後我想問…點解成日話就嚟無氧氣的ba…卒之捱到十幾分鐘既場口既？﹗
• 即係呢，講消防的片集總係離不開生命可貴，捨己為人，睇完個人都寧捨熱血~~~哈。或者係因為拍消防好多場地、器材都要借助消防處協助，跟住出勤唔係火就係山要不就係意外，只能集中講點救。唯有在其他場口如私人生活著墨咁，變咗創作空間無警匪片咁誇張？﹗
• 啊，《十萬火急》好似無乜影佢地喺局度打排球？﹗XDDDDDD

*************************************************
我諗係《烈火》情意結，睇開有條癮：

祖國篇：《烈火男兒》 (search才知道有這麼一套片集…)

港台篇：《火速救兵》 (太早做啦，都未返得切屋企睇，不過據說網上廣播站可以睇番呀呵？)

日本篇《RESCUE》 (好鬼《傲氣比天高》條formula，一堆細路如何成長的故事，不過如果身在火場見到呢堆小朋友嚟救火都會…幾驚…)

外國篇：《烈火雄心》 (係咪應該搵埋呢套片嚟睇呢？﹗哈哈哈哈…)