[日劇]《流れ星》…這就是純愛日劇了嗎？

其實點先算係「純愛日劇」 我可以沒啥概念…其實睇…係為了睇豐哥…(佢上一部《Boss》我都係咁講架…卡卡…)

原來被我捧上天的《悠長假期》(仲有呢篇)乃係純愛劇的經典之一…小的可是完全唔知呢type就係囉…。一講「純愛」兩粒字我只諗起偉大的愛情(拍手﹗)和死人榻樓咁，一閃出嚟就係光一王子那部悶到我瞓著的《ハルモニア この愛の涯て》，要不就是《一公升眼淚》那種生離死別的…Oh，呢部劇英龍華女王真的令我哭出一公升眼淚來的…。

Ok，講咁多前奏其實想說的就是看之前我對豐哥這部新作是有點卻步的…嘩﹗又嚟絕症…又係衰人阿哥…又係還債…嘩…又係呢啲炒埋一碟既絕世悲情片嗎？﹗但見同事瞓身推介…咪又睇吓囉…

(又說，自從上年《烈火雄心3》後…我都好像提不起興趣看日劇了…嘩…好久不煲呢…)

(劇透喎有﹗)

個故仔都ok韓劇的(我承認我是將所有娘爆既狗血悲劇公式stereotype做「韓劇」類的…哈)，硬係難關一個接一個，有少少眉目時就硬係有啲衰人出嚟攪屎棍，弄得因意外而結合的男女主角本來漸漸生出真感情來，又莫名其妙的要分開…當我以為最大的難題：手術都做咗，健吾和梨沙二人可以好好發展時，又嚟一單甚麼記者揭發事件，跟住又說甚麼衝擊最終回，讓我以為會有乜高潮(即係好似《14歲媽媽》咁阿媽媽又係俾個記者纏住…最終回生咗成集先生到個bb出嚟，有啲催淚位架嘛﹗)…囧﹗又因為健吾話為了梨沙好而離開佢自己乜都攬上身而解決了…吓？轉個頭就一年後啦？吓？﹗

我最大的疑問都係：點解阿健吾見梨沙係O型血就搵佢做捐贈者，血都未驗檢查都未做就啦啦聲結婚，仲過晒數俾佢咁…佢又知梨沙一定適合呢？(雖然後來劇情都有講健吾自己係走投無路先諗出契約結婚呢條橋既…)

好在個故仔主線娘爆之餘還有啲溫馨窩心位，健吾和梨沙感情，神谷醫生對瑪梨亞的關懷之情，媽媽、健吾和瑪利亞一家的親情，瑪利亞和涼介的愛情…都來得細膩不突兀…至突兀係做衰人大佬修一既囉…見親佢就想打爆佢個頭(即是說稲垣吾郎演得成功了？﹗)…吓吓都纏住個妹為佢添新麻煩…好在佢最後佢總算做番啲好事咁。

聖誕流流睇埋啲灑狗血既悲情片真係大吉利是，好在最後大團圓啫…

我的看點：豐哥…其實個角色好鬼似《瑠璃之島》那種木納寡言的木獨人，本來我以為阿美奈子走番去搵佢想做番捐贈者要重修舊好時幾驚又攪出拖拉三角戀，但木獨佬竟然已經下決心要和梨沙一起…倒真是出乎意料了…

本來不是我看點的上戶彩反而變成看點了，她的戲從來都是我skip項目…不知何解我不太喜歡她成日做的幹勁熱血女…今次做悲情風俗娘，一頭金毛再加男仔化語氣…嘩﹗完全反轉我對佢一貫既印象，真讓我覺得她是在演戲而不是演自己囉…。另外，佢呢套劇好多性感場口(男粉絲會很高興吧…有一場仲打出肚皮添…)…即係呢…冬天流流佢都仲熱褲長boot…好凍喎？﹗佢點抗寒流架？﹗分享吓啦﹗

北乃妹妹好一貫啲開心妹妹既樣；睇阿松田翔太做醫生…我又諗起《一公升》既水野醫生…日本啲主治醫生跟病人關係倒真是close呢…呀…不過個角色由松田來演覺得硬係有點怪怪…唔知呢，可能睇《Liar Game》印象太深…硬覺得佢似欺詐師多過似醫生…XDDDDD。

最後…睇到已先講到「雙子座流星」…反而全套劇不停出現水母架喎…我仲諗緊點解套劇唔叫《水母》而叫《流星》呢…

但見得豐哥木口木面太多…我開始懷念佢《Boss》或《長假》入面個開籠雀樣…回吓呢兩部劇帶先~呵呵。

*****************************************
(題外話，前陣子海關關員爆肝咪得同事捐肝既，再睇《流星》見日本要近親三圈((中文應該點講？))先可以捐，要是近親圈來無適合人選就要等腦死亡者捐出，就算有個三九唔識七的人自願走出嚟捐都唔得，劇中涼介就係因為姐姐適合但佢有了身孕而不能捐贈，最終等唔切適合捐贈者而死了…呀…咁香港呢方面就flexible得多了…看來…)

(題外話2，當《囧探》成了中佬的喜爺拍檔由當年小環變了Linda妹，而家也變了中佬的豐哥拍檔由當年《星之金貨》的彩兒變了今日的彩妹，歲月催佬老但拍檔青春依舊，只可惜現實中的彩兒法子姐由小丸子媽媽變了毒后，可真是令人感概萬千…囧)

官網