嬴在起跑線之馬路版

我常說不理解家長為何有「嬴在起跑線」之心，我決定來個親身體驗…喺馬路度…。即係呢，同家長不停feed小朋友學呢樣學那樣一樣，我同樣不能理解 啲人點解唔理條馬路多唔多車，總之一剎無車飛過就衝出去，當正自己劉翔欄王咁款。呢一水，我決定我每次過馬路都誓要等到綠燈先行…
 

當我企定定睇啲馬路欄王衝燈時，真係睇到好多人生百態呀，包括有啲阿叔啤我(咩啫，守規矩犯法咩？)，有阿媽想拖個女衝燈但阿女話「紅燈喎…」話未 說完就俾個阿媽扯了出去…，又有人衝完回頭望我露出一個奸笑…，最爆係明明對面有兩個軍裝喺度，大家都照衡(皇室堡對住維公那條馬路，都好繁忙吓架喎 ﹗)，當中包括兩位修女…啊…咦，衝紅燈算唔算犯罪呢？﹗呀…聖經個年代未有馬路呀呵？(啊…又諗起我RS拎E的傷心往事了…篤)

Well，企定等綠燈時我好像體會到未染上「嬴在起跑線症後群」 家長的心理，大家都衝但自己企定定，慢了起步喎﹗自己明明無錯但又做了小眾，心裡不禁有一吓疑惑我係咪應該跟大隊呢…羊群心理啊﹗但衝燈又危險又有被警察 罰款的危險…喂，我等一吓先過不是更心安理得嗎？都係爭那一兩分鐘，有幾蝕底先，你估我真係劉翔咁快咩跑得，一個唔該跑跑吓俾架殺出嚟既車boot一 boot嚇到魂飛魄散咪仲衰…。Well，應該不太多人會咁諗吧？跑遲一兩分鐘真係蝕底架，香港人嘛…

老實講，有時明知啲馬路十年都唔會有車經過，衝的意欲真係好大，其實…雖然唔啱…但唔過又真係對唔住自己。但我不能理解啲繁忙既馬路(如Sogo對 住那條咁丫)，熙來攘往的，啲人都照過可也，好似一心等啲車停嚟就自己…嘩，遇著個司機小心留神就話啫，如果遇著粗心大意的司機…又遇著濕滑的公路…呀… (我可能諗多咗…哈哈哈)

見到啲人衝出去典知有架車飛埋嚟攪到要dup停企番埋行人路時…小的壞心腸係有個心涼喺度，暗叫「行番嚟啦，車死你呀﹗」…。又話說有次見到一單咁 既野，喺一條對住巴士總站既十字馬路口，有個阿叔就係咁衝燈失敗要行番埋行人路，小的心想「車死你呀」時…背後有個大叔竟然口講出我心底話﹗那一刻我真係 想俾個5佢…但同時，行番埋嚟既大叔(喺我前面)聽到我背後大叔的話竟然轉身問：「你話我呀…」…後面大叔又理直氣壯地答：「係呀…」…前面大叔竟然就一 個飛腳踢埋去…跟住兩個大叔就在街頭打起來…囧…而家啲人真係好燥底耶﹗明明係前面大叔唔啱在先架喎…

雖然企定等綠燈會受人白眼，但我又幾enjoy守法既心安理得，再望吓人衝燈失敗真係幾有樂趣，呢個實驗值得繼續堅定落去。雖然，我有疑問…我想問警察幾時先會票控啲亂過馬路既人？﹗睇住佢地車都唔望頭也不回咁衝燈，真係應該罰吓佢地囉…

另一篇：
Me世代