參一腳談HMV

見報導說呢家店申請破產面臨閉店，連日FB都被洗版說可惜咁，如果我無記錯，最近一張在HMV買的唱片是安室奈美惠的《Uncontrolled》，影碟是國慶那天買的《寵物情人》和《打擂台》DVD，咁啱，都係等人時百無聊賴入去兜個圈而買的，目標為本的話，其實我唔會去HMV的

也許信和和集成啲CD舖執笠我會發出一樣的哀呼…囧﹗Jazz呀Classical呀那些outlet唔多，要又多又齊的話地方又確係越來越少…少一個地方就真係少一個，難怪HMV要執的話咁多人會莫明失落了…

呀，如果說特登去的話…應該係聖誕EVENT前去買隻聖誕歌的碟…明知佢實有嘛…同埋呢，N年前有DJ(定Tower Records？我記得又一城以前那家是有的…)同埋而家播歌都好嘈，喺個咁嘈既環境我好難專心搵碟買既其實…

其實，咁多年我的幫襯都不多…重點…是貴﹗讀書時代雖然亂買碟但零用錢少嘛，而且當年自命死忠粉，唔使試聽隻碟一出就買架啦…哈哈哈。日文碟的日版mark up得叫人(我啫其實係)頂唔住，台版的話好啲，single通常都係貴十零廿蚊(中文碟個mark up水位都好高的說)((安室隻《Uncontrolled》台版都係105蚊上下，我諗去小店都係平10蚊倒，就算啦…))，但讀書時我又覺得好肉尺，不如行多兩步去集成買啦，每每就放低轉身走人。

記得以前有啲crazy sale真係好crazy的，啲奇異碟可以平到十幾廿蚊有交易，而且係全新喎﹗好有尋寶FEEL，不過近年都好似無咁crazy了…我記得N年前我試過以十蚊買過隻郭城城N年前的舊碟架﹗

呀…我想話近年日文碟個corner細咗好多呀﹗老銅店搬咗去對面Park Lane之後好似無以前喺皇室堡咁有樂趣，跟住個corner細咗勁多，莫講話舊碟…連新碟都唔齊…真係好頹…Jpop如是…Kpop原來都唔係好被重視咋喎…都係得走廊轉角位的一個小角落…囧﹗

近年尋寶既多數都係影碟，CD我除了幾個死忠對像外，都好少買碟了。街頭巷尾的VCD店雖然係平啲，不過店面唔大， 大部份地方都放新碟，想搵舊戲真係要靠緣份，小的又衰唔鐘意上網買，係都要體驗吓親身搵到既興奮，好多時都會無啦啦喺HMV啲DVD櫃既角落度搵到要騎的騎呢舊片，通常啲舊片99蚊3隻，雖然三十幾蚊都唔係特別平(最極致係10蚊隻﹗哈哈哈)，不過難得搵到就算啦…

就算返屋企唔多睇的…哈哈哈。

其實搵碟…好似CD Warehouse和HK Records好行啲…雖然個舖面細啲…。Um，或者既然而家個市場買碟既人少咗咁多，與其做mass market，不如專target啲仲肯俾錢的了…所以…我個Jpop corner唔見咗了﹗囧﹗

Well，即管睇落去睇吓故事發展會如何啦…

26/07/2016後按：間店仲喺度，不過多咗好多精品，多咗好多影碟…CD嘛…不要再說了.jpg