[港劇]《紫禁驚雷》…是咁的。

琴晚看了一集，直覺告訴我：你浪費了一個鐘。或許是比較武斷…不過直覺呢家野好主觀架嘛…

• 一睇張poster﹗嘩﹗乜咁似《洪武》(sorry，真係要提一提呢部本人至愛)，兩男角拎刀拎槍在打，其他角色一字排開…嘩﹗(其實好多劇張poster都係咁排的…是program來的嗎？insert劇照入去就得…哈哈哈)
• well，唔係琴日食飯見轉了第二套劇我都唔知原來《團圓》做完…呢套《紫》有陳錦鴻客串順治一角喎…嗚…典解會無咗《萬凰之王》架﹗(未免太多鴻哥了…無記要捧佢嗎？)
• 我又要再問：乜無記而家無人用咩？怎麼馬海倫姐姐三線劇都見到佢架？跟住馬明和麥包都有在《真相》演出，唐詩詠仲要兩套都同馬明一pair…跟住兩套馬明都做奸既…(都好似係會害唐詩詠的…)…嘩…
• 馬明自從《女拳》後係咪決意走奸佬路線架啦？(不過都好過佢扯起件衫chok樣sell男士美容，無惡意，我ok佢的…始終演咗咁多年戲唔可以再吓吓《律政新人王2》、《衝上雲霄》那種忠忠直直既角色既…)
• 真正令我想打此文的重點來了：怎麼馬小生…阿多寶哥又係啲有為青年角色呀﹗套套古裝都係咁既﹗(時裝反而好少少…)…《鐵血》、《big血》、《蒲松齡》呀咁，套套都係佢好有本事，但未露鋒芒，跟住因各種原因本來承位的人唔知點解閃咗就推佢上去，跟住佢又硬係好有能力去將件事lead得好好，又本來佢鐘意的女仔會俾另一個男角mark咗，佢就在一邊默默為佢守候，之後又總會等到個女仔同佢一齊…呃…真係是咁的了。
• 劇情無啦啦有啲twist位(通常都係陰謀的真相)…但好創新地用黃鏡頭配獨白交代番件事…但想使唔使嚟個《霋時感動》咁有感情既旁白嚟講呀？好驚喎﹗
• 呢個pt可能比較無聊(我個人根本就無聊啦﹗哈哈哈)，想問呢…劇中人個個衣服都有毛領，咁天氣凍先會著得厚架…但頭頂又唔使戴番頂帽…唔凍咩？(京城喎﹗係京城喎﹗oh well…講故不要駁故了…)

又如睇《洪武》時…小的一路睇啲劇情一路滿有疑問：

• 孝莊太后死時是康熙二十七年，康熙8歲繼位即係當大約35歲…劇情琴日話裕親王三子昌泰剛剛出世，維基說小孩是二十一年生的，即係康熙29歲，二皇兄阿裕親王30歲…睇睇吓覺得怪怪地：點解馬明(裕親王)反而係陳國邦(康熙)阿哥(搵黎lokyi會唔會似啲？)…
• 親王既仔唔係貝勒咩？點解叫佢阿哥？皇帝既仔先係架嘛？
• 見到羅樂林和俞子明在大殿上跟皇上議政，兩官講野時自稱本官……成個皇上棟喺度架喎…係咪太無禮呢…
• 我唔明京城唔係好大架咩…點解民間放孔明燈咁易飄入皇宮仲要俾皇上睇到？
• 跟住我又唔明點解消息傳得咁快，馬浚偉喺官府度同人理論，轉個頭傳到皇上耳中，佢就傳口喻叫人了事，而傳口喻那班人又轉個頭去到生事地點喎﹗(諗起《鳳凰四重奏》講八國聯軍打到嚟，第一我唔明點解當時京城子民會知乜咩係八國聯軍((字都未必識喎大佬﹗))，同埋點解會知太后走佬囉﹗)
• (謎之聲：睇劇情話順治曾經同裕親王講會傳位俾佢，後尾傳了俾康熙，令裕親王深深不忿…但以小的睇幾廿次《康熙大帝》((不過都係睇到玄燁都仲係兒皇帝啫…))…康熙之所以做到皇帝係因為佢出過天花…當時天花盛行，有啲阿哥因此病死，順治驚皇子養唔大做皇帝唔長所以先選個已經出過有免疫力的仔嚟做皇帝架喎…)((謎謎之聲：雍正繼位就話其他皇兄/弟有爭議…康熙都有俾阿哥嚟爭位咩？))

um，還是努力追埋剩番幾集《真相》。以上。

繼續睇下去的開心大發現：[港劇]其實《紫禁驚雷》是一套笑片