認人

除了娛樂版的人物，或者有奇異特徵/行為/事件令我特別記得外，一個新識而長相身高行為身份都正常的朋友，本人都需要頗長時間去記住他/她的臉，認人和記號碼…本人都是比較差的…

前陣子聚會上見番很多不同年代的舊同事，好些在面書有接觸就還記得名字和樣子，但離職已久的真係無印象…望了好久…完全諗唔起係邊個…卒之趁人少少時搵人問…吓？舊同事嗎？有這樣一個人嗎？

我常諗如果我做班主任的話，新學期開始時我大有機會已經唔記得上學年的學生…因為我係可以升班後就唔記得上年好些同學…望住個樣覺得好熟但就完全諗唔起個名…在面書上偶然收到校友的friend request，有一刻真係想ignore…我同你十年都唔知有無一兩句，大家只係萍水相逢喺過同一間學校度讀過書…都…可以算係朋友嗎？﹗

咁曾經處於同一地方相處過都係緣份嚟既，accept啦，雖然叫做「friend」但卻連對方係乜水都唔知…add到自己好多「friend」，但會互相留言吹吓水的來來去去咪又係嗰啲，呢啲…可算是現代城市人的孤獨吧…

記得商大有老師說過，交換卡片自我介紹過後就應趁印象尚新做點筆記，例如寫低相識的年月日，又或者寫低人家樣子的特點云云。小的只做一半…會寫低交換卡面的日子，樣子嘛…又係我的騎呢因子發作，對方樣子有「特別」的地方…例如超濃化妝、聞得我噴嚏連連的香水味…或有奇異行為(例如打爛沙盆問到篤)我就很容易記得；掉番轉乜都無的話…都唔知係我唔好彩定你唔好彩…真係要見多幾次先記得…很多時公事上相見…明明唔記得對方係乜水都要扮識，「唧」番個親切笑容出嚟先…

有時真係想請教酒店業朋友或樓下的看更叔叔嬸嬸，點解佢地可以鬼咁快就認得邊個人住邊間房/屋(唔通我有啲乜野騎呢行為？﹗)，最勁既係清潔嬸嬸(我住的屋苑係判，嬸嬸成日轉人，我唔認得佢時佢認得我…仲居然知我住邊層…驚唔驚先﹗)

很記得隔離夫婦搬入嚟時從來唔打招呼，又早出晚歸，我諗咗好耐究竟佢係咪住隔離個單位…但人家黑面在先…小的無理由仲懶係親善同人家「爆咗舊冰」架嘛。人家兩夫婦的尊容…我都係對咗好耐先認得﹗啊…係住客嚟架…仲係隔離鄰舍添…唔係白撞的…囧…

又咁講，有啲人係想記住但太多野記而記唔掂，有啲人就係面目可憎得可欲多觀之，連望都唔想望，又點會想記得佢副尊容，係有分別的。

呢一篇：深夜驚魂之幼稚園