《囍帖街》IU

我想話真係誠意滿分﹗完成度極高的廣東話咬字唱足全程，聽到毛管都篤埋，即係呢，好多時啲外國歌手要打華語市場都唱國語啦﹗當係為演唱會準備在地人熟悉的歌啦，練廣東話難度高過日文國語英文幾多呀﹗本身已經like IU呢個小妹妹，而家再like多幾分﹗

(雖然，佢個詭異床照事件真係好詭異)
((然後，怎麼大會反而打錯了廣東話歌詞﹗))
印象中呢，好似多數都係台灣歌手會為香港市場唱吓廣東歌，而多數都係一首半首attach喺國語碟後面，翁倩玉姐姐《阿信》既主題曲、蘇慧倫《我一個人住》、許美靜《明知故犯》、吳奇隆《一天一天等下去》(佢啲咬字唔準得嚟巧可愛!)呀咁，通常，嚟得香港出廣東歌都係人氣的表現。近年的，我只記得楊丞琳喺陳柏宇隻碟度有首廣東話版的《理智與感情》，據說因為佢屋企有人講廣東話所以發音超標準的說。

印象中呢再係，多數都係香港歌手掉轉頭出國語碟，有不標準的郭城城，有一度讓我覺得國語碟好似仲好聽過廣東的陳醫生和古眼神，仲有謎之人物陳妖lone，那年頭好似要聽國語歌先型架嘛﹗

之後…之後…好似無乜人會特登為香港出(唱)隻廣東歌了？

回說IU妹妹，希望佢可以keep住呢個自然風，第時唔好因為無人氣而要走去脫衣賣性感…噢。
(就說小的韓流畢業，但有幾個泡星出碟係仲有追的，IU妹妹係其中一個囉~)