[港劇]《洪武三十二》5~完場吐糟區

傲千戶：bobo你笑乜？
bobo：笑套劇終於播完囉…

*******************************************
雖然小的睇得莫名興奮，仲越追越欲罷不能，連街都唔想去(啦啦啦，我肯出嚟食飯的話就證明你妳您係我朋友啦﹗哈哈哈哈)，但真心講，唔ok的地方都幾多的：

• 慳皮到丫﹗啲打仗場面真係笑爆咀，無論係京師、北平、濟南定邊度都好，都係那個城門…好爆…跟住啲兵戎相見的場面又頹，我估啲臨記人數仲少過古版《神鵰》最尾一集打大汗…不如全部戰役都用旁白交代就算啦…
• 還好都仲有錢整兩隻馬俾啲將軍騎吓…唔係真係笑爆咀…
• 我唔明點解燕王一路由北平向南打…典解劇情話一路步步進逼，但佢又得閒喺王府同楚楚卿卿我我…仲每集都要將佢當成千三娘要咀一咀佢…囧﹗
• 第15,6集燕王(sm掀起了一個高潮﹗)走佬返北平後日日喺王府行行企企食飯兩味，拖拉到唔恨，反正無筆直，不如cut咁5集戲啦…上一個星期睇到瞓著咁濟…
• 其實頭幾集阿太祖皇帝駕崩時我就想講，有乜理由一個皇帝既大喪會咁hea得十幾廿人著晒喪服就算…
• 等到2x集終於皇上同燕王開火…哈﹗呀燕王呢頭攻完濟南不成，嗰頭返北平嘆世界…嘩﹗雖則話古代版圖同家陣應該唔同…不過都應該差唔遠丫…濟南同北京隔了天津架喎﹗(sorry，小的對祖國地理認識很差…哈哈哈…)，而家搭車都怕且要幾個鐘…古代應該都要走幾日路掛？
• 即是說小的以為燕軍大破明軍會好睇番的時候…哈﹗尾先嚟是是但但喎…求其幾條片啲士兵打嚟打去就算，今日的大結局真係無敵反高潮…
• 呀，我又想問，阿燕王整色整水就係唔想俾人話佢係反賊，想自己疑似名正言順的坐皇位，但燕王人又會稱朝廷那邊的軍隊做明軍既，咁咪approve了自己係反賊？
• 我繼續都係想問點解永暘公主個名係叫永暘，呢個唔係應該係封號？唔係應該叫番朱櫻嗎？(睇維基先知…無呢個公主喎﹗)
• 大結局最尾阿傲笑風跳入皇宮救皇上…那一吓「跳入」我真係笑咗…粵語殘片嗎？
• 雖然阿laughing哥保養尚算得宜…但我真係接受唔到佢同王君馨係青梅竹馬囉…打個折當laughing哥三十幾歲，王小姐好難似三字啫？
• 講起laughing哥，電影《laughing gor之變節》而家已經講天華哥係double臥底，而家古裝片都要double臥底一番…無記也真愛玩臥底呢條橋呀﹗(下一檔《點解阿sir係阿sir》都玩緊呀…好悶呀…)
• 大結局先發現原來陳山lone個角色和江若琳係一樣年紀架…都唔知係個男既偷笑定個女既喊好呢…使唔使攪到啲男既後生咁多呀？(咁山lone哥係keep得ok既…)…跟住問題就嚟，古代唔係應該女仔細細個就嫁咩…典解皇上未做皇帝已經結了婚，但同佢同年紀既公主仲可以周圍hea既呢？

呀…我係咪又認真咗？
*******************************************
well，呢套片的樂趣就正在其天馬行空，先唔好理佢將歷史亂咁炒埋一碟(咁《倚天屠龍記》都係based on歷史再作一番架啦﹗)，實在當佢係一部古裝《學警》咁睇係相當有樂趣的，色情事業、秘密警察、無頭谷、bl、sm乜都齊，唔得你死，真係好耐無睇過一套劇竟然可以男女老幼集集都除一除衫，跟住又勁血腥(第29集傲笑風自砍隻手真係好驚訝…嚇死人啊…可惜呢個twist帶唔起個頹到暈的結局啦…btw，江若琳最後幾集講佢嫁人要成熟穩重後，唔chok聲後表現好咗好多囉﹗) ，都可算喺無記一眾c9劇當中殺出一片很大的niche market(於是吸引到我睇…雖然我覺得結局是爛咗尾…)

話時話，既然都疑似古裝《學警》，不如就咪鬼攪歷史野啦，畫虎不成反類犬，而且無記又無筆直去祖國大地取景，不如索性集中中前段啲查案野，幾好睇喎真係﹗講真架，燕王走佬返北平後好睇度就直線下降啦﹗

最後…um…bobo辛苦你了，谷住谷住，唔怪得劇入面啲有口難言場面表情咁到位啦。

yeah，追完，夜晚終於唔使趕住830返屋企了。以上。
*******************************************
《洪武》發癲實錄：

[港劇]洪…洪…《洪武三十二》…

[港劇]再講《洪武三十二》…

[港劇]《洪武三十二》…除…

[港劇]《洪武三十二》4~貼圖篇

[港劇]《洪武三十二》5~完場吐糟區

唔好意思我笑咗…