【小熊人擂台賽】7：讀書年代最喜愛的科目

可不可以俾我貪心啲，將我的飛佛概括為《文史科》呢？﹗(即係文學+歷史) (終於有機會俾我分享本人既「娛樂版煲書大法」了…)


(《江山如此多FUN》﹗很爆﹗個人喜好我係鐘意中史多啲架，西史係高中時讀得多啲，再睇蔡子強既《新君王論》…就鐘意歐洲史…特別係英國…特別係邱吉爾﹗佢好型﹗又有文采﹗)

俾個IQ題大家估吓丫不如，三民主義三民係邊三民？﹗ 請用英文作答。(博主當年考英文卷嘛﹗)

係，小的飛佛就係至多野背考試又寫到手斷既文學和歷史(還好歷史我係考英文，要不像中國文學咁寫3個鐘中文隻手仲有得剩既…)。

喜歡既原因除了係本人天生缺了理科既慧根，除了maths和bio好一點外，其餘都係完全不過電，考試測驗屢創低分新紀錄…仲敢嚟咩。選文科是理所當然，都 真係選時也不用諗太多，兩科勁背書既加兩科疑似實用既，典知…以為好實用既係一啲都不實用…呢兩科背到傻既係本人興趣，同時在公開考試又係好多學校既水泡科，俾小的冷手執個熱煎堆拎了個幾靚既grade~

好了，講吓開首說既「娛樂版煲書大法」吧﹗

我 諗好多人聽到history就怕怕，都會覺得本書講既事幾千萬年前，啲人又死鬼晒，關我鬼事咩？﹗可以講關又可以講唔關啦，無以前既人和事又典會有今日既 你和我呢。即係呢，娛樂版和八掛雜誌既人和事都唔關我事架，典解又睇得咁開心呢？﹗小的自小八掛，總之有得八來龍去脈就開心，咁Simon Lee係咪喺玄武門K.O.阿哥細佬呀咁，同娛樂版入面阿邊個同阿邊個係咪拍拖係無兩樣既，都係一律當娛圈八掛咁睇一餐，本著好奇心去起底就自然易入腦。 雖然我有興趣既八聞多數都係野史…會考係唔使考慈禧同榮祿究竟有無舊情重燃…(sorry…我睇《慈禧宮廷秘密生活》太多了…XDDDDD)

又說小的愛睇電視，睇睇埋啲電視劇劇情入晒腦啦，就好有興趣去搵番正史去確認吓，當年睇完《射鵰》講靖康之變就想去睇吓宋史上呢單係咪真係咁勁響深，但好失 望中史其實係得兩段咁大把…講岳飛又無提過佢係咪真係俾阿媽紋了「精忠報國」喺背脊，又無講油炸鬼係咪真係用嚟整鬼秦檜喎…更加不會提包公啦﹗我想知宋仁宗(這是一個多麼不吉利既名號呢…)係咪真係俾龐太師食住…八皇爺又係咪真係好人呢？﹗

opps…離題了，其實正史以外我好鐘意八野史既…哈哈。即係呢，唔好將本書當係要死背入腦既書，當正佢係本八掛雜誌咁睇，睇到邊個章節記得有劇集/戲講過既話就去搵吓小書/網頁確認吓，往往會有好多樂趣既。呢個方法係work架，睇我文學歷史高分過中英文就知啦。

文學個模式似似地中文科既，都係一篇課文學寫作手法咁，但較之中文科就多好多研究番作者生平同埋那個時代有乜事發生過，影響作者會寫篇咁既野出嚟。其實同而家我地寫blog或流行曲歌詞沒兩樣既，都係我手寫我心或想以文載道咁啫。

小時候睇古裝劇都會想，點解我地唔係著劇中人既衫梳佢地既頭？﹗點解香港會無啦啦割了俾英國人？﹗如果慈禧當年唔係掛住嘆拎咗海軍啲錢去整靚頤和園中國而家又會點呢？﹗又或者，明治維新如同治中興一樣衰咗，日本會唔會已經俾人食咗？﹗

奇想太多了…哈哈哈。不過寫Essay好多時都有呢啲奇想題(當然不能答得太天馬行空啦…)，想講既係，課文係死既人係生既，盡量諗啲生動有趣既方法去消化內容，幾艱澀既內容都會KOable架啦﹗(咦，做乜我講到好似補習天王咁既口吻？﹗)

啦啦啦，咪話我淨係偏心喜歡既科目呀，那些我自問完全攪唔掂既科目我都有努力過架…

例如…chemistry啦…

啦啦啦…

哈哈哈…

呵呵呵…

h2o﹗可否快快用力射我免我變輕挑~~~~~~

可惜不是所有合成物都有歌仔唱囉…要不我IS會有興趣讀好多架﹗﹗﹗﹗

**************************************************
開估：

中文：民族、民生、民權(無民主份架，答呢個會扣分﹗德先生民主呢個概念係再後一點二十世紀初先傳入嚟我國既…)

英文：Minchu, Minsang, Minchuen (係可以音譯，仲可以用廣東音譯﹗死未﹗不知孫中山先生見到會唔會激親…) ((用英文讀中史，啲翻譯有時好攪笑既…))