金話梅十年浩劫片(我又搭嗲…)

睇到琴日生果日報娛樂360的這條題目真係邊睇邊笑…最爆係當中好多套戲我有睇，仲係入戲院睇呀﹗(這才是我笑的原因吧﹗)

《桃色》~呢部戲堪稱奇情之最，究竟呢部係艷情片？鬼片？定驚慄片？劇情…我真係up唔出…只記得吳嘉龍演既差人無啦啦被章小姐攝住，然後做出很多奇情動作，章小姐個角色又怪怪雞雞…整套片我只記得很唯美既濛鏡…囧…而最囧既係…我有入戲院睇架﹗

《無極》~呢部和《滿城盡帶黃金甲》我覺得係孖生兄弟，懶係現實和幻想兼備，但實情睇完…嘩…啲場景好壯觀囉﹗同埋有幾場很騎呢的懶經典場口，個故事呢？﹗哈哈哈﹗真係up唔出喎﹗(回帶：周天王在《滿》劇入而個造型…umum…佢不如唱番歌啦…)

《我阿媽發仔瘟》~燒餅~燒餅~燒餅~(Ricky Martin聽到自己首歌俾人咁改法會唔會反眼呢？)我記得呢套野阿家燕姐和昐昐姐喺報紙度嘈過一輪…指責對方辦事不力攪到套戲唔收…但…真係會有人特登入場睇嗎？燒餅~燒餅~燒餅~

《阿嫂》~(點解無咗《江湖》﹗)呢套我又有入戲院睇架﹗記得係本來想看的都滿了，於是就求其揀一套來看…仲要係午夜場來的，就係因為攰攰地入場，前半段劇情唔多記得，而後段引為佳話既唔知點解連環大撞車…我係悶到瞓著咗﹗所以嚴格來說，我係無睇過呢套片？﹗

《芭啦芭啦櫻之花》~喺電影台度睇過啲。點解只係睇過啲呢？個intro說阿王演既角色叫王錦勝，反過來就係感性王…嘩…好爛呀呢個gag…即刻無mood再看下去。(謝太那水有部《無限復活》，和鄭伊麵合演的，反而幾好睇﹗)

《蘋果咬一口》~呢套我喺電影台睇過好多次，我覺得ok好睇喎﹗只係阿容天后既演出係幾浮誇(佢演一個model…阿陳小東係攝影師)，幾難頂吓的。而呢套野個定位又好奇怪，愛情不愛情，親情不親情，乜都有啲無乜重心，唔係有我欣賞既陳小東都唔好會睇落去…(好似奇異地有羅小豬的…)

《九個女仔一隻鬼》~又不是八十年代~~~~~~~救命呀﹗唔同晒樣架啲女仔﹗

《失憶界女王》~中國星有一水係一班固定班底，撈來兜去的拍，電影嚟嚟去去都係那些人，真係唔多分得出《戀上你的床》/《性感都市》/《絕世好b》/《絕世好bra》/《七年很癢》卡士有乜分別…啊…《失憶界女王》咪就係同以上幾套片成日喺有記電影台度睇到…一見就轉台…

《老鼠愛上貓》~喂呢套我喺電影台睇過喎﹗爛攪展昭和包公白玉堂等人物，本來阿白玉堂係女仔仲會同展昭有段情幾創新吓，但又真係無乜感情舖排…啊…我成日將呢套片和另一套《小白_情海翻波》兜亂，都係謝太主演既古裝片…也是永遠睇唔完全套的…

《我要做 model》~鄭生和森美啲所謂model造型…無不讓我想速速轉台…反倒是林嘉欣演鐵男幾好笑，喺一堆攪笑但唔好笑既人度演正經角色，反而好笑喎﹗

《情癲大聖》~前一陣子無記播過，離奇地我又坐低睇咗陣…只能說，公司有錢開戲俾自己人拍真好，唔使驚無野撈。

《擁抱每一刻花火》~作為敬hins忠粉，我好誠心去買咗呢套戲既碟嚟睇(我咁唔buy史小姐和方先生…都特登買咗唔知愛愛愛既第幾集…呃…講大話情人那套囉…)，吳唱k和race既演技真係好…哈哈。我幾鐘意敬hins和吳日言那段，吳小姐竟然係演自覺很正的少女，拒絕了貌甚電車男既敬hins(佢個造型係四眼又cool牙的…)。過一段日子後電車男無再纏住佢，某天吳小姐走在街上，見到除咗牙cool的敬hins在旺角街頭唱著《Hurt so bad》﹗嘩，好到啊﹗

《犀照》~除了很難頂的滾筒式瘋狂宣傳令我先入為主頂這部戲不順，實在呢套戲…um，某次喺有記電影台睇到少少…呃，阿嬌做律師講「我要同佢上訴」…真係唔夠硬朗…爭咗啲喎﹗

《新紮師妹 3》~為了胡二少，我曾經以身犯險嚐試睇埋呢套佢…但此片的柴娃娃和唔好笑扮好笑的程度…是我這個自命終極無聊的人也受不住…對不起呀劍雄哥，我不能接受你在此片的行為…你都係同方麗娟合作好笑啲﹗

《風雲Ⅱ》~因為無名一個「霸」字(英譯"Ba")，又因為一個完全無故事既劇情，同埋阿sa對白只有「風大哥~~~~」「雲大哥~~~~~」，連林雪都比她有發揮，我同意，這是一套爛片。

以下是一些我的心水：

咒樂園~唔知有無人記得呢套？﹗入戲院(係呀﹗我真係入戲院睇架﹗)時有個3d眼鏡，但戴咗係一啲都唔立體，又唔驚…

絕種鐵金鋼/絕種黑玫瑰~一套係梁家輝lead，一套係毛毛姐lead，再搭很多英記群星，和很多超級爛和硬的gag…最驚既係…我買vcd番屋企睇架喎…點解呢？

umum…