明星狂想曲

現在做明星，比起以往任何一代的藝人都難，同樣的暗裡辛酸，卻沒有前人的風光、私穩甚至尊重。萬幸本人從來無發夢做明星。不過，偶然都會幻想吓嘅…

如果我一出道就被受力捧，實有人話我「靠關係」、「靠老細」、「爭寵」云云；如果我不受重用，又會被人話「被雪藏」、「棄將」。好好運，公司對我還不錯，我 被塑造成「少年XXX」，掙到點注意力so called「人氣急升」，出街有FANS問我拎簽名呀﹗除了那原裝XXX 的FANS外。過不久就開始被大起底—屋企人、同學仔、街坊、校長甚至三九唔識七的人一齊出呢講吓我係個點嘅人，做過啲咩事；奇怪的是，嗰啲指指點點的人 可能係可唔識甚至見都未見過的。

繼續「人氣急升」，衣著造型要落重本了。藝人一定要一身名牌，就算收入同支出成極大不正比；唔使理啱唔啱自己，總之係潮野就得。緊記無時無刻都要「性感」-低v、露背、露腿，可惜我唔吝嗇身材時又被指象腿甲組腳平胸水桶腰﹗橫掂都要執，唔爭 在執埋個樣，包面、扁鼻、大腮骨全部整走；要是有人翻舊帳咪話化妝囉，再唔係就話大個女無咗baby fat，就算媽媽都開始唔認得我都唔好認﹗索了的我吸引不少麻甩FANS外，還引得不少傳媒影我走光相，令我曝光率大增；同時更被封為新一代「性感女神」，那些「最想咩咩」和「最想物物」的第一全都是我的大名，雖然，我其實唔多想被咩咩和被物物﹗從此，無論幾凍都好，我都不得穿上長袖衫，再見了﹗

話晒都係年青人，耐不耐要同啲老友出街架。但同男仔出街又話我「界仔」，同女仔出街又話我「斷背」。好啦，正正經經搵個男朋友仔又話我「瘟仔」，又話「被公司放棄」、「人氣急跌」云云。匿喺屋企咩都唔做咩人都唔見啦，點知又被人偷拍話我「自閉」；落街放狗飲杯咖啡和鄰居訕一訕又話我「發電」，攪不好對方係個中年男子又話我「姣溝中年男」，都係講兩句，攪好鄰里關係之嘛。真的還未找到，稍為傾得埋的同行，男男女女都好，只要行埋講兩句野就話「受溝」，仲畫咗一 個「感情關係圖」描述我嘅感情世界…有好多個我都唔識架喎…

好在，終於出到唱片。公司大力催谷廣告處處時就被人寫我「阿爸出錢力谷」；出商場show谷歌被寫成「蚊型show」，其實都係攞吓經驗啫。咁首歌雖然係快，但一開始都無諗住要一堆dancer伴舞，後來當然係被人話「寒酸」啦。出咗一輪，做咗幾個雜誌封面，撈到幾個代言人合約，滿以為前途一片光明時就被雜誌封面寫「唱片濟銷」、「賣肉換XX」；好在公司無理仲出第二版，我笑住咁出席慶功宴，師兄師姐無呢就比人話「鬧不和」，咁佢地都有野要做架。代言人廣告出街，工作時偶然同場遇到上一手代言人，無講到野就比人傳對方「心有不甘」，但我地又唔熟又各有各忙緊，邊有互相敵視喎。

一番辛酸後終於見曙光；幾年來的頒獎禮由「新人獎」拎到女歌手銅銀金，掙到個「小天后」的美譽回來。「天后」的生活可不好玩，對著的不是工作人員就係狗仔隊；一點私人空間也沒有，記者一句「讀者知情權」就有理無理繼續影繼續寫，原來我係無權say no的。也許呢啲係紅的代價，我已好幾年無好好放過個好假啦﹗唔係唔想放，但一唔見人太耐就會傳「被包」，一排無見出番呢肥咗小小又話「有咗」，唉。過不多久，人家開始說我的歌「無新意」、「抄人地」，都說我「過氣」了﹗為帶點新意給自己和觀眾，我嘗試拍劇，又被傳「拍劇換獎」、「大救亡」，為咗呢個新嘗試，我特意轉了個新形象，又用心研究劇本，可是出來收視平平，新形象仲成為大眾笑柄。同時，樂壇冒起一浪又一浪的新人，而我，就被冠上「前天后」、「食白果」、「火羅王」等稱號。

如此又過了幾年無無聊聊被稱為「二、三線女星」的日子，某日，我遇上了一個有型有款有事業的他。 被寫衰了咁多年，我決定退下來，全心全意發展第二個事業--家庭。轉眼，我和他三年抱兩，除了湊仔，得閒就去行街HIGH TEA食飯。估唔到退下來的我還有點新聞價值--耐不耐就有雜誌影吓我的少奶奶生活。呵呵，次次見到自己見報我不禁報上一個幸福的微笑。

幸福的日子並不長久，幾年後我和他離婚了，原因係他「搭上」了某新進女星，也有雜誌說他頂唔順我太高調的行街睇戲食飯，唔理屋企的仔女。我那有﹗當然我不會食這隻死貓﹗離婚後子女歸他所有，我亦可以全心全意「重建」我的事業，可是本本書都說我是「棄婦」，對我「復出」都不看好；好些更大倒冷水，說我已三十到尾，如斯「中女」形象不復當年勇。當然我也知，所以我選擇當個演員--仲要係實力嗰種，為顯示我的誠意，就是只有巫三個鏡頭行行企企的角色我也全心全意。我相信，我是「飛得起」的。

不過「中女」在香港好像沒有太大市場，一兩句對白過過鏡的日子日復一日，沒有人再在意我 --除了偶爾幾本雜誌偷影一下我，某次在超市看女性用品，看完放下沒買就說我步入更年期；我可沒有心煩氣燥﹗行多幾步見到個記者，我只係鬧咗兩句「影咩呀影」，第日就被寫「過氣失婚女星思覺失調，現況淒涼…」…

咇咇咇咇…噢…鬧鐘響…慘完了…發完夢起身返工了…

(27/2/12後按：我好像都沒怎樣再寫這樣的RPG式文了？﹗哈哈)

封面女郎 梅豔芳 (@封面女郎, 1990)
作詞：林振強 作曲、編曲：倫永亮

她的星光繽紛的散在各方 雜誌封面裏 她的風光她的爽朗豪放 被列入新聞裏
她的新裝閃閃的宴會晚裝 號令各界都心醉 她的不安她的心裏情況 並沒暴露燈光裏
雖然人在擊掌敬仰 她空虛如常她裝出頑強 她感情上沒多少進賬 間中她深宵一個人唱
I don't wanna be be a cover girl 為求形象自衛地建外牆 多麼的想找到 真正朋友傾訴夢想
I wanna be just a simple girl 共情人漫步大地上看夕陽 多麼的想拋開 千片惆悵與面霜 Ah..Ha..
(多麼不想披起千片惆悵 再望窗再望窗 Ah..Ha..)
一週一週她彷彿也在駐守 雜誌封面裏 她的身手她的一串朋友 被獵入相機裏
她的風姿演出的漂亮舞姿 號令各界都心醉 她的空虛她的幽怨詞句 默默盛在她心裏