2012/01/02

[港劇]最後的《天與地》

愛剎這個「如果,命運能選擇」的結局,邊看邊想著《年少無知》的歌詞正在感動如果現實真如幻覺般美多好的時候…呃…中年家明…做乜成個林利咁既樣?﹗囧﹗我忍唔住笑咗…

另…我想問幻想版裡GINA是患了甚麼病?

估唔到雖然結局一早被爆,但看下去還是很動容,被取消了的ROCK FEST本來只有阿YAN一個在咩都無的台到發呆,點知嚟下一個嚟下一個,最後黑仔車埋啲架生嚟,大家就在台上JAM《年少無知》,台下每個人都聽得入神(但呢首歌有PLUG過咩?XDDDDD),連SUPPOSE驅趕人群(點解真係咁驚有人聚集呢?)的軍裝哥哥都入神地聽到跟著節拍搖的說…個畫面好有趣…

大家熱血了一晚就回到現實,盲的盲,被拉的被拉,走的走,結局也走向結尾,完。噢,更有意思的是之後播的是叱吒(怎麼《那誰》只有第7位?唔係好HIT的咩?)…大嬴家是唱作歌手大少喎…跟住又說《年少無知》入到頭20位,阿娘唔鍚我,總算有個阿姨識欣賞,THIS CITY都仲未DIE得晒既。又說,其實我不太喜歡林狗,但佢一句要DIE都要DIE得有型…係喎﹗哈哈…

中間啲黑仔和鼓佬在生意場上你爭我奪因為事忙而一時有睇一時無睇,不太清楚,反倒是大結局鼓佬為了救個小朋友而死…而那個小朋友竟然就叫家明﹗GINA抱著他說要大個做個好人時真係好攞命…不禁眼濕濕了…

另一爆點是阿YAN走在路上又見電話檔裡走出來的家明,才發現原來阿YAN一直不能原諒的不是三個佬,而是當年佢鬧完家明放棄理想,家明說佢返轉頭就唔放棄,但當年佢還是一氣之下走了…導致家明在山上死掉…原來係咁﹗初頭仲估只是特登來個和第一集首尾呼應,原來解謎解到大結局都仲有。難怪阿YAN雖然怪三個佬沒好好照顧家明讓他死掉,但還是原諒他們了。又難怪咁多年佢都放唔低家明,連搵老公都搵個把聲似佢的…OH﹗

個人最鐘意在黑仔婚宴後,靜靜的BALLROOM裡空無一物,黑仔躺下望住瞓咗的阿YAN一幕…呀,阿YAN醒來哭著說佢係咪醒咗還真令小的動容,是第一次覺得咁動容喎…蛇視后還真是做得出色了…

三個佬,要數陳豪造型最爆,但角色複雜應該係鼓佬,明明自己係個有野心的人(才會唔想俾BB縛住要GINA去人流吧?),因為內疚而壓抑自己去做老好人,入局失敗就索性做番自己,那個面口真係好可怕啊﹗而GINA陳芷菁…或許這也是第一部劇讓我覺得佢可以發揮…從跟老公由冷淡去到確認,但確認要跟住呢個老公時又要面對佢可怕的真面目,啲錯愕(或曰O咀)表情好到位耶﹗RONNIE…可能係發揮比較少的一個囉…

少年版嘛,最京京係少女YAN把聲,九里遠都聽到佢驚呼狂叫,兩年前嘛﹗近期的《紫禁驚雷》見佢做李詩韻侍婢時好多了﹗而4個BAND友…其實我想問佢地隊BAND有無名架?同埋有時唱BEYOND啲歌走走地音?係咪因為佢地疏於練習導致要散BAND?﹗呵,其實除了鼓佬個頭和家明外,其實我唔係好認得黑仔和RONNIE個樣的…哈…

************************************

其實呢套劇都唔算好難明啫?初初睇時不留神確係會漏咗啲細節,但轉個頭實在HINTS提番你係咩事…比起平時咩都畫公仔畫出腸,呢套劇又真係有唔同既,又說如果9點半係洗碗時間,咁太太們行嚟行去又真係好難跟足既…只是睇唔明係真係睇唔明定唔想睇得明?係覺得劇中人高呼的東西否定自己肯定的東西而抗拒了?OH,可能我諗多咗…

最有趣的是無記既反應,十足十《我的如意狼君》陳秀珠忌怕野仔胡諾言會搶走自己親生仔陳山LONE地位,搶走晒老豆啲身家咁,表面上一副親切的樣子,背後卻冷淡不堪。無記個反應都好無記啊…還好,收視不甚了了,但好野還是得到大家欣賞(而,1月尾就播戚其義新劇《4 in love》,同時又將29集《天與地》一次過放番上mytv,算係低頭了吧?﹗)。《天與地》就如大結局的ROCK FEST一樣,熱血完了…咪又繼續番無記一貫的劇集…大家又要繼續欣賞胡囧姐的精湛演技了…OH YEAH~

除了THE CITY IS DYING,小的更記得一句「趁自己成為一個不知所謂的中年人之前,去瘋吧」…小的成日覺得,打從出世開始,讀書考試搵工結婚,每一樣都有既定模式,做足就等如有成就,但呢啲野人認同既野係咪等如自己想有既呢…UM…如果逃離現實做自己的方法只有去旅行(OH﹗又係做著一樣既野﹗)…呃…WELL,出來做事確係要妥協既,不過留一點少少空間俾自己去瘋也不為過啫?

劇完了生活就要繼續,ROCK!~(其實我唔鐘意聽BAND SOUND嫌佢好嘈的…哈哈哈﹗)

[港劇]《天與地》差天和共地
[港劇]又講《天與地》~如果~命運能選擇~~

10 則留言:

  1. 有一集做佢地後生嗰陣在台上唱Beyond,台下有個唱片監製,Yan帶埋佢地去佢張枱,被人話你地連唱口水歌都唔掂,一語中的!

    回覆刪除
  2. Gina 應該係中左沙士卦~

    回覆刪除
  3. 我一睇就覺得Gina應該係沙士,時間亦應該吻合。
    我覺得少年band唱beyond走晒音係特等掛,如果唱得好,就唔洗咁霉啦,就係唱唔好先散=P
    其實套戲真係唔係好難明者,好多point都好到肉,但好似啲人忽視咗啲point只係想睇復仇

    回覆刪除
  4. brownie :
    我一路睇時都一路真心地覺得…乜唱得咁難聽…
    但有一集喺婚宴度唱《對你愛不完》又OK喎…哈…

    回覆刪除
  5. 匿名:
    你有你道理﹗都諗唔起添﹗

    回覆刪除
  6. 藍映:
    係啊﹗大家一講又似係喎﹗
    家明佢地又話寫歌…卒之寫嚟寫去就係一首《年少無知》,我諗起長瀨當年套《巨星夫婿》,唱足十一集都係一首《一個人的牙刷》…
    對的說,套劇只係唔咁畫公仔畫出腸,有啲情節靠對白和鏡頭畫面去暗示,唔講得咁明,但留意前文後理一定會跟得番和解得到謎…
    或者…觀眾都被縱慣唔想用腦了…悲…

    回覆刪除
  7. 它除了熱血,還夠膽反映香港現今社會。所以才能引起各界討論。不過熱潮完了,我們還是繼續生活。有幾多人,能夠因為呢套劇,而獲得一個解脫?

    回覆刪除
  8. 其實中段都好睇.
    你有提到D人唔睇係否定價值果PART...
    其實講得好岩.
    我覺得每個中年人心中都食過一個家明.
    即做過1錯事咁樣,可能係唔讀書 /讀錯科 / 入錯行 .....
    因為哩1件錯事,搞到住後人唔似人
    即好似入錯行,係咁OT玩辨公室政治...
    唔讀書一世基層做低下勞動...
    情況同4子(包埋YAN)一樣~
    所以中年人係唔想睇番呢D咁陰暗面既事.
    無記果道,我又唔覺太衰,當初崤定有支持,但之後D主角走晒,捧紅佢地出去搵食又冇咩理由既~,但D宣傳都OK.

    講下首歌,搵到林若寧填詞好岩,林好有呢類既睇法,當年安哥前程錦繡有D類同,都寫得好好. 2首連聽幾正.

    回覆刪除
  9. 木鈴兒:
    對啊﹗而且仲要一針見血的篤落去講社會現況,通常無記啲劇就算用個時事topic嚟做包裝,還是會走回舊調formula的說(我諗起《隔離七日情》…

    雖然說熱血過後一切回復舊模樣,但用心看的人一定會有一點得著,就算生活上我們無辦法改變多少,自少改變到自己心態,讓自己活得舒坦些既…

    回覆刪除
  10. NgKwong:
    我就係成日都會諗如果當年唔係揀咗咩咩咩而家會點,遺憾的事當然有,不過還好那條憑感覺走過來的路都算ok…無錯到好似4子咁返唔到轉頭…

    或者,做人應該向前行,唔好吓吓轉牛角尖,見到阿yan最終解開到家明之死呢個心結我都好開心呢…

    首歌既歌詞我覺得比《笑忘書》更中要害,只要有一點經歷的人都很容易投入到和感動到的說…

    回覆刪除

要講幾句嗎?﹗XD