作為一個公開試的過來人…是咁的

因為又到聽到地獄魔音《綠袖子》…呃，都係考評局攪到佢咁邪惡啦，well，即係考試季節又來臨，雖然我已經係N年前既考生，但每年聽到呢首魔音都猶有餘悸，可見創傷幾重呢。話實334已經實施多年（時日如飛⋯又要唱呢首歌），尤記得propose出嚟的時候係話將公開考試二合為一係要減輕考生壓力的嘛，但而家好似有過之而無不及⋯真係點解呢⋯

無錢無後路只能頂硬上的話，朋友，我明既﹗我真係明有幾痛苦的。

我唔會講求學不是求分數，求學唔係求分數貢求咩呢，當然人際關係呀、處事能力、獨立呀等等都重要既，而作為一個職場老鬼，我對新人的要求只有「正常」二字架咋。但掉轉番我係學生的時候，成績真係會主宰好多野。然後諗住都畢業N年啦，但申請政府工時要睇會考成績，報Master又要搵番陳年成績出嚟獻世⋯大囧。真係跟一世的說。

雖然，係可以考其他試去證明番現時語言能力去到邊既。有一刻為了A-Level UE個grade我真係有諗過係咪要挑DSE⋯好在⋯無事⋯

呀⋯我講緊前陣子報MASTER的事⋯

貢講係咪好絕呢？係架，喺我話多又唔係多話少又唔係少既搵工經驗當中，真係有公司到而家都要睇會考成績，又會覺得半山大或郊野大以外的大學都是垃圾⋯

Um，好灰貢。所以呢，我覺得朋友們要知足，知在於知自己能力足以去到邊個level，目標要achievable。社會就說入唔到U的是loser是廢青，但呢個世界真係有人唔適合或唔識玩考試遊戲，與其浪費時間死chur不如認清自己志向壯士斷臂。當然，要抵受姨媽姑姐白眼係幾難受，但不停repeat也不是辦法呀⋯當然呢個世界無幾多個李＋X可以穿膠花穿到發大達，但路總係有既，認清自己長處搵合適的路，討生活總不成問題，只要你的要求不是發大達⋯achievable呀achievable呀﹗

或者⋯過程中係會俾人白眼（特別係新年拜年時），呢個情況求學完係會繼續，畢業問繼時拍拖，拍拖問幾時結婚，之後就係買樓、生仔搵學校⋯我成日覺得喺香港要唔跟大隊走自己的路係需要有鋼鐵一般的意志。係⋯那些唔爭贏在起跑線的家長，我支持你地架﹗

至於決定死chur DSE的，一試定生死慘啲定係我當年既痛苦延長辛苦啲我真係諗唔通。總之，當年我屋企無錢供我去外國升學，最多都係重讀中七搏多年，要不就出嚟做野，貢目標好清晰，我入U不是為甚麼學問，我只係唔想咁快出嚟做野，無後路之下逼出人生從來未出現過的堅毅力，因為⋯我只能順住教育制度討學位嘛。⋯注意係堅毅力咋喎，唔係實力⋯哈。貢自己有幾多本事自己心知既，手持會考分數又決定了前路大半，排除法下我當年目標只有商大和隧大。事後先知既事係其實半山郊野大都可能有啲科係易入既，不過呢啲係後話啦。

我成日話，中七係我最黑暗既時代，捱過了好更真地以為份U係天堂⋯怎料更黑暗的日子尚在前面。有人話回頭望公開試唔算乜野⋯但⋯我⋯覺得我唔會有力再去考多次（有啲人懶勁話自己而家去考實高分云云我⋯笑⋯了⋯囉）Anyway，回頭看我發現原來專注喺試嚟我個小宇宙都唔差架喎﹗

總之，目標要乎合自己能力，做多啲research，人云亦云是水來的能載舟亦能覆舟。有時候要決斷啲自己為自己決定將來。雖然⋯我從來都係隨遇而安的⋯貢⋯知足者常亦樂，係好事嚟既。

另外，要讓自己情緒有個出口。當然係啲無傷大雅既架啦，那怕係80年代貢去尖東隊Jolly或唱K發洩⋯呃，好年紀之顯露，總之要讓負能量發出來先有心神再溫過書。當年（其實而家都係）我係唔開心就遊巴士河或去坐小輪吹風⋯吹到人都癲後好似按F5貢重新嚟過⋯又或者，將一首聽得我好感動的歌重覆聽一萬次，當中喊又好跟住唱又好乜都好，想到嘔後好REFRESH。有好多當年喪煲的正能量歌而家聽到都會即刻想起呢個煲書年代的說。

我好想講分數不重要但又好似唔係，但入了U又代表乜呢？又好似無乜大不了，畢業出嚟撞著經濟唔好一樣雙失，好自相矛盾。呢個過程中除了儲分儲學位，更重要的是了解自己長短處，識取長補短在人生路上總有用處。至於大學讀過的⋯雖然我而家份工計分類係同一Cat，但⋯其實我唔會寫4P或做SWOT囉⋯

雖然有啲老細課信成績名牌，都有啲係睇你啖吐文筆既，無事﹗

總之，盡了力TOUCHWOOD衰咗亦無乜好怨，或者係一個轉機讓你發現條路應該點走。兜圈沒大不了，朋友們，加油吧﹗