關SK《Shirley's Era》

記得SK姐復出第一個演唱會時出的是精選碟兼得幾首新歌；到上年的concert時見一口氣派了兩首歌上台，加埋《同事三分親》的主題曲都有3首歌出咗街，應該會有新碟助一吓慶吧？﹗點知…演唱會的影碟都出街了…過了成年有多新碟終於出台…

望穿秋水得可以呢…

一直覺得SK姐最吸引是她的聲音，迷幻電子野飄吓飄吓既又得，pop到不行的三連音三連音三連音也得，她的聲音就有本事為歌曲賦予新生命，讓人一聽就知係佢大姐的。持才總會加點傲物嘛？最近報說她大姐心灰意冷了，這可能是最後一張碟。姑勿論係為推碟造勢，還是當事人真係唔想玩了…，一路覺得SK姐和特區的樂壇格格不入，或許…係錯配了…。傳媒不是比較關心她兒子生父係咪掌門人嘛？(其實…關我鬼事咩？﹗)

講番張碟，一看songlist感覺是頗奇怪的，2首派台歌(仲有2首REMIX)+2首電視劇主題曲+古眼神的合唱+兩首《12金釵》+一首派台的國語版，12首歌入面有多首早就面世…點睇都似精選碟多過新碟吧？

派台歌類：

1.　天規 + 11.　天規 (Remix)

《天規》我初初聽時諗起屈原的《天問》(…這是楚辭…唔係歌來的…XDDDD)，如果我無記錯個remix版好似係match番演唱會叫《unexpected remix》的？﹗除咗加了些人聲其實兩個版好像沒啥分別…

4.　山水 + 10.　山水 (Remix)

原版好像《大江南北》(年輕的朋友知唔知tbb x年前有這樣一個節目介紹我國風土人情既節目呢？)，anyway，即係呢好似去咗啲黃山(我亂講的)山頂，有種騰雲駕霧的感覺(我聽緊幅國畫？)。remix版由慢歌變中版，西洋電子mix中式笛子聲，好有趣，感覺好似fashion show啲歌咁，好有型﹗這個我鐘意remix版本呢…

+改編類：

12.　花鳥 (山水國語版)

廣東版係山水畫，國語版加多隻了小小小鳥，感覺無廣東版咁孤寂。不過啲國語發音好似英文…要睇番歌詞才確定自己無聽錯…

主題曲類：

5.　只得一次

其實我覺得這首歌旋律和歌詞都頗公式的流行曲，係SK姐唱得好聽了。其實佢大姐有很多歌都係聽既時候覺得好聽，唱K時唱到自己好悶…想stop咗佢就算的說…(如《離去請關燈》、《最深刻一次》咁…)。大姐把聲係靈魂呢﹗

7.　鑽禧

我覺得成套《豬肝補氣》最可取就係這首主題曲。名門三姊妹的愛和恨嘛，這首歌就夠奢華、氣勢，又grand又glam。這套野我只看了加埋唔夠8集，已完全感到整整80集係幾咁死唔斷氣…煩到爆，最match劇集主題的係首歌。 (首歌咁dramatic，但SK姐上《勁歌》企定定咁唱﹗囧…我仲期待會有啲舞步和造型配合吓添…)((又說，可惜上年演唱會時只唱了《只得一次》，如果喺紅館個stage度唱這首視覺享受一定都很華麗呢﹗))

已收錄在其他大碟類：

3.　男左女右 (古巨基合唱)

自已copy自己，寫古眼神新碟時說道：「SK姐係萬能合唱王，寶記各大男歌星張天王、李克人、炸蜢，再到近代的醫生都令本人聽出耳油的(06演唱會的《親愛的》﹗)， 不過同古SIR這首我就有少少覺得你有你唱我有我唱，還好，你有你我有我的情況沒有和周玉女合唱那首《愛得太遲》咁誇張…」不如下次整首下集《各行各路》或者《離行離辣》啦﹗(這是某次吹水時講到的…哈哈)

8.　三千年前 (Remix) (李香琴獨白)

《12金釵》我見好多博友都有賦文讚美，其實我一路都無聽過…這回是第一次啦。琴姐把聲好有戲…好勁…要哀怨有哀怨，要少女有少女，SK的歌聲忽然好似陪襯咁…

9.　眾生花

這首好有型﹗(也是首中西合璧的fashion show音樂？﹗XDDDD)任花朵點嬌艷，轉過頭年華老去「歲月叫花瓣放鬆　轉眼不再紅」，SK姐冷冷的活像冷眼旁觀咁唱出來，好悲涼﹗

新歌類：

2.　地盡頭

《天規》感覺係強硬和aggressive，呢首《地盡頭》就軟弱一點，焦點收番細去情情愛愛，感覺好無助…和《天規》係個很大的對比，兩首排在一起頗有趣的說。


6.　28日

初聽唔知想表達啲乜，看一看博友文章才知是講女性生理周期。很迷很幻…
************************************************

我呢啲pop友，都係最buy《鑽禧》﹗

唔知SK姐係咪真係退出唔玩？當然希望唔係啦。得閒出吓碟玩吓等樂迷多啲選擇不好嗎？

全碟歌詞
小奧：關淑怡在她的【Shirley’s Era】
小百合：緩慢但超前的《Shirley’s Era》