[日劇]好懷念的《悠長假期》

久不久就想翻煲《悠長假期》，等小南輔導瀨名之餘都輔導一下我。這天突然很有衝動翻煲，放鬆一下緊張的心神，學小南話齋：「每逢人生不如意時，就當是上天給你一個悠長假期吧﹗」放鬆啲啦香港人﹗

19/10 update： 經重溫後發現原來句放假對白係瀨名講…唔係小南講先…

《一公升眼淚》，對不起你突然跌了一級，成為本人想睇日劇第二位…

一個爛爆的笑話：表妹某次說人生(指女子)一定要買一次LV，我冷冷的笑：「我買咗啦﹗」，表妹極驚訝，我說：「《Long Vacation》丫嘛，咪LV﹗」哈哈…

話說《長假》大hit時正值本人開始哈日，留意日本偶像情報之餘看上了當時hit霸之霸木村先生，見他主演的這套劇到97年還被大煲特煲，好奇之下一人獨闖信和購入生平第一隻老翻日劇VCD—盛惠三十大元的《悠長假期》唔知第幾集乙隻。我識呢套劇再發展到好想睇時離播出時間已足足一年，但老翻店仲夠膽死分開一隻隻賣嚟搶錢，可見這套劇多受歡迎。買完九秒九返家睇那隻唔知第幾集(總之唔係第一集)，完全驚喜：片頭主題曲點會咁好聽？個片頭點會拍得咁休閒舒服？ 木村隔離個鬍鬚man點解會咁靚仔(睇圖丫唔該﹗)？點解唔係由第一集開始睇都睇得我津津有味仲明個故事講咩？點解明知咁貴都仲好想睇落去？…對唔住，木村先生漸漸得不到我半點注意。

打著補習的藉口經常蛇過海之下斷斷續續的買了中間五集，睇得如痴如醉，可恨無頭無尾非常唔夠喉。某day該分拆上市VCD店竟然不再分拆上市，全部老翻老以六神合體盒裝上市，天呀，我的五隻碟該當如何呀？雖然有竹野內豐(我係為咗睇佢先想追埋其他集數﹗)，本人竟然忍到幾年後雙失等放榜的日子才入手，這次雖然無靚靚膠盒得個爛鬼膠袋，總算可以一圓煲足全套的美夢，價錢又平咗，服務又好咗(睇檔的金毛哥哥比以前分柝上市檔口的肥佬有禮貌十萬幾倍﹗)，終於，歷時三年，我才完整儲齊全集…

睇之前，零煲劇經驗(睇無記播得唔算架呵…)的我除了識木村(偶像嘛)、松隆子(都係偶像嘛)、和廣末涼子(都係偶像啊，當時的她好細個呀…)，其他演員我係一個都唔識，莫說驚天大發現竹野內豐(雖然我有睇過亞記的《星之金幣》…)，山口智子直頭唔知佢係邊個，但一看就給她開朗笑容吸引住，她演的南可說是慘絕人寰—事業因為到了三十歲而被投閒置散，結婚時新郎在行禮前才來逃婚，唯有強迫未婚夫(或逃婚夫？﹗)的同屋主瀨名(木村)讓她共住，夠慘了吧？但她整天笑容滿面，一派樂觀的樣子；反而失落鋼琴事業的瀨名比她更愁，愁到整天苦瓜乾面口。既然難關一定降臨，何不學小南一樣笑住口面對難題？黑仔總有盡頭，黑暗盡頭就有光明，就當係放吓假。如天台的廣告板說：Don't Worry, Be Happy﹗

愛日劇，除了靚仔(竹野內豐，行出呢型唔在講，彈琴時輕佻浮躁的樣直頭殺死人)，更愛劇集的中心思想，睇完，真係有野諗有野思考。

為了呢套劇，除咗獻出人生第一次買vcd經歷之外，仲買咗人生最貴的cd~《長假》ost(如果唔計受不住誘惑而買的日本版碟的話…)，盛惠一百四十個大洋。橫睇掂睇都唔似原裝日本版(似台灣版就真)，但為了儲得熱愛的主題曲，還是乖乖的比錢走人。話實，十年過去，久保田利伸(我曾以為他的名字是「久保條脷伸」…)的《La La La Love Song》輕快節奏完全不覺脫節，邊聽邊un聽飲杯冰凍樂，真係人生一大樂事。

哼哼，短期目標今晚三集，中期目標每日至少兩集，長期目標星期日再睇《一公升眼淚》之前煲完。

回帶：竹野內豐喺套戲度真係好型﹗嘩哈哈哈哈哈

睇番舊相，山口智子、木村、竹野內豐、松隆子啲面口十前後都無咩變到，變得最多應該係學生妹變做媽媽的廣末涼粉吧…

另一篇： 

我最喜愛的十套日劇

我最喜歡的日劇歌曲

18/05/2016後按：不得了…這部已經20年啦…太可怕…
[日劇]20年自high系列~《ロングバケーション》(Long Vacation)