瘋狂煲戲日

這幾天無聊聊開電視都一煲不可收拾，不知何解電影台播的都極合本人心意，之後又引發本人去搵番啲買下久久未煲的碟出來煲…

以下的戲大部份都是怪戲(算唔算爛就很難講…)

The Basketball Diaries (邊緣日記)

想當年《跌落嚟號》 一出令里奧仔瘋魔萬千少女，不幸本人都係其一。欣賞ing的例行公事就係搵番前作出來看，抱著睇靚仔的心態就睇一套嚇一套，里奧哥舊作基本上無一套係靚仔的說(最四正應該係《一切從心開始》…)，這套《邊緣日記》做70年代走上歧途成為癮君子的高中生，感覺很似某套80年代港產片(但忘了那一套…總之都係講道友的…又或九字頭的《生命揸fit人》…又或者係《門徒》入面的張靜初)，驚覺當年十來二十歲的里奧仔演技真係神乎奇技，做嗰樣似嗰樣，反而覺得他在《跌落嚟號》的演出不甚了了…

呢套，凌晨點幾鐘做，睇睇睇到四點幾…睇完先醒起我其實有餅帶…使咩捱眼瞓煲呢…

五億探長雷洛傳(第一集)

這是星期日晚上看的，在此之前星期六晚有記播了差不多時期出的《92神鵰俠侶之痴心情長劍》，當中的笑位劇情相比第一集實在無得比，頂唔順轉台看《邊緣日記》了。今天一開電視又見到劉華，不過本人對這套《雷洛傳》觀感好好多，雖然已睇過一萬五千幾百次，還是很樂此不疲的說，見到總係不自覺坐低睇。每次看好像在重溫50-70年代香港史，見到片中差人所作所為真係大開眼界；唔係講笑，唔講都唔知56年九龍有暴動過的說。

不過呢，本人是較喜歡睇下集…主打因為…有郭先生演出﹗(那個頭gel得令人很難受…)但每次看都令本人大惑不解，何以明明係手足入面最後生的雷洛，到第二集尾段時竟然會老過豬油仔、顏同等人？好驚喎﹗

Big Fish (大魚奇緣)

這套vcd買了很久，但一直只放在一旁未看，放了年多昨天終於的起心肝那出來看了。戲中的爸爸愛說故事說到天花龍鳳的， 兒子從小聽到大只覺老爸一派胡言，長大後離家自立門戶，到老爸病重才再回家。再和老爸相處，細心聽他的故事，才慢慢了解他是個怎樣的人…

戲看了大半才慢慢投進去，初頭有點不明所以，這是套奇幻片嗎？到老爸為追一見鐘情的媽媽待在馬戲團三年，為的就是班主每個月講關於媽媽的一件事…哈，傻勁得 好可愛﹗做兒子的慢慢了解父親，漸漸不再對父親胡扯故事反感，甚至和他一起編老爸人生最後一段路的故事，很感人的說﹗看畢，有點眼濕濕，原來劇名的「大魚」就係咁解…

辣手回春

唔係講笑，真係覺得呢套好睇，Benz雄、林雪、黃文惠一班做又三十六唔做又三十六的醫生護士離譜又過份，極襯醫院名稱「何求其」，淨睇佢地平時吞pop求其做野情況已夠爆笑，再加埋匿埋醫院頂層唔見得光的「高層」和「好高高層」、經常被雷打中既何求其爵士，笑到暈﹗都唔使睇鄭伊健的救車如救人和魚佬陳小春。基本上，成套戲只有張柏芝係正常既醫生。

唔知這套戲有咩想借戲諷今(如按本子辦事，要填呢款嗰款form咁啦)，我諗應該有少少吧…不過我對醫療制度既野唔清楚…咁邊睇邊笑就算啦。片尾出end roll時都仲要玩唔正經廣播，真係笑到尾的說…

其他鄭伊麵電影文：清影碟的雜碎文

假男假女

呢套X年前在無記看過，過多年再在有記看了一次﹗驚為天人呀﹗相信現在要視帝穎又煙又酒仲要camp camp地都幾難、明明扮咗女人都仲係好男人既陳國邦，和睇極都睇唔出佢係男人既梁漢文「拍拖」上來、愛上孿人兼願意等對方變直的陳寶蓮…個卡士…好強呀 ﹗而且很無記--視帝、陳國邦外仲有唐文龍和曹永廉…orz…我諗這套戲是探討直和孿人的心態吧，不過我被以上的奇怪劇情吸引住，邊睇邊嗌救命…

前兩日又睇到重播，我再次miss咗個開頭…激氣呀﹗

Spiderman 2 & 1

我都覺變態，先是星期四入場看第三集，星期六翻煲第二集，現在看明珠台播緊的第一集，總之咩汁都撈勻，看來片商應該頒個榮譽粉絲獎俾我…

睇番第一集入面既Harry仔個樣好細個，第二、三集就成熟咗好多；反而Peter仔三集個樣都無咩變過…

另一篇：SPIDERMAN3...隨想

圖片來自豆瓣