2016/12/22

[日劇]真完結.《真田丸》

因為我有一份功課拎了真田信繁做主題,於是極速狂睇大量佢既資料…嗚…雖然明知結局係咁但都不免異常悲傷,始終《官兵兵》官兵兵係喺屋企老婆喺身邊安詳咁過身,真田田就遇著一堆豬隊友,只能奮身一戰力挽狂瀾,每秒都覺得好心up…

又說,三谷叔叔好勁地由頭到尾都保持幽默跳脫格局,就信繁抱住乜野心態返大坂城問題上,訪問中佢就說是抱著要嬴。當然豐臣家出手叫佢都有啲關係,不過我覺得唔係全部,也許佢望住阿爸壯志未酬未瓜咗,眼前又有機會,就想放手一搏吧。

um,是的,心存信念,一定有路行。(provided that無豬隊友連環攪屎棍)

(這份功課,比我想像中難以落筆…真的,我好討厭用英文讀日史,會考之後仲嚟…真係好想死)
((《逃恥》拎了《真田田》一開始的六文錢劇情講解嚟惡攪…笑到斷氣…))
((((03.01.2017後按:《陰差陽錯的女演員們》2016sp齊藤由貴一部份都有玩《真田田》啊﹗佢演阿茶局嘛))))
(((以下係感想…是十分濕星的…哈哈哈)))

又說因為要睇好多資料,見到有啲街坊評價說這套太攪笑啦,昌幸變成戰國第一烏鴉口(-->跟邊個死邊個﹗),然後大哥就有句名句「閉咀黃口小兒」,當鬧佢的室賀叔叔死咗大家又忙緊follow大坂之陣status的時候,冷不防大哥喺第49集用呢句鬧番室賀個仔…明明緊張傷感標到上心口(劇情係大哥趕去大坂想勸服信繁唔好討死),但突然出呢句…真係笑到斷氣

心up除了是信繁知其不可而為之,仲有大哥想如佢願,好有愛但又好心傷。始終,到關原之戰之前信繁其實無乜大作為個,佢只係做吓人質同support吓阿爸,佢阿爸有名望好多…所以之後入大坂城信繁唔被信任都無計…

另外最爆當然係信繁和桐的世紀一吻,一開始睇劇情介紹話桐係信繁側室,then先係梅跟田田(都係咁叫番信繁開心啲)生咗個女仲瓜埋,再度滅窗殺手(簡稱窗手)阿春喺九度山生咗幾個仔女(書說是兩男兩女),阿桐都仲未入門…但佢又多次拒絕佐助(令次佐助示愛都好好笑)…真係心向田田得好緊要,但田田硬係無反應…心諗都應該唔會有下文的時候…佢兩個竟然來個10秒的一吻﹗我.睇.大.河.咁.耐.未.見.過.接.吻.戲囉﹗仲要10秒仲要桐一路錫一路講野…《逃恥》都係借位的時候這邊來個這樣的世紀一吻,真係好爆﹗

(學茶茶話齋…我都好好奇你地兩個係乜關係)…((然後桐說腐緣…哈哈哈))

真田爸昌幸喺九度山時度出嚟的對付德川兵法,完全意味不明…哈哈哈,真田哥睇到眉頭大皺。想話呢,睇《天地人》和《真田太平記》(我真係睇緊喎﹗1985年囉大佬,巧京京,最京係草刈大叔演真田田…)當中既昌幸都係老奸巨,但更加係奸,唔止表裡比興,直頭係賤格既level。呢套呢,昌幸都係古古惑惑,但就可愛好多,最爆係咩,跟邊個死邊個呀﹗


出戲系列除了有古美田和長澤忘情一吻,仲有佐助和星野秀忠,喺《逃恥》佢地係同事…仲要啲對白都有睇佐助既忍者身份…笑爆。然後,佐助既畫功好高…比起真田爸既玄妙兵法…

豬隊友除了茶茶,當然要數大藏卿局同佢個仔大野治長,個老太婆乜都話唔得,又唔信浪人唔信到連田田都唔信…咁你覺得自己憑乜對抗德川(唔,就係等家康死)…真係勁嬲。then大野應該洗白得好緊要,因為佢最初都係anti-浪人,後尾同大坂power ranger合作,但最後…最致命的一擊…唉…就係佢…囧


啲豬隊友又要浪人幫手又唔信浪人,又亂信胡言,敵我不分,到最後秀賴都動搖,實在令人太憤怒。睇住真田六文錢互片,then家臣門哭住互篤,大助要返大坂城殉死,個心up到一大個點…嗚…

加埋田田,呢5個人就係大坂城power rangers啦~~

根據資料說講田田係「日本第一兵」的應該係薩摩藩藩主,但呢套劇係咪佢無出場…而上杉景勝同田田既牽絆比較多,於是呢句就變成係wani叔去講(《民王》陰魂不散)((呢套有兩位爸爸,出年《女城主直虎》有翔君和小秘書)),係別有意義既﹗(((直江兼續個愛字無《天地人》聰哥那個咁大喎﹗)))

田田呢幕單挑家康好難唔諗起《風林火山》最後川中島一戰上杉謙信單騎殺入信玄本陣同佢單挑,而唔而唔知點解田田個身收埋咁多槍,第一把射唔中時拎第二把諗住射,又俾秀忠(可惡的星野平匡)所傷,嗚,良機已失,返魂乏術。家康又嚟走佬,同佢一開始走佬又是一個首尾呼應…即係呢,我喺跟播過程煲完《風林》,呢頭睇山本勘助想推勝賴上武田家當主之位,《真田田》呢邊佢做家康就幫手摺埋勝賴,令人好精神分裂…

貼多張田田,實在太有型。

雅人叔一開始演15歲小少年係有好多吐嘈,雖然眼紋…是有點的。但你睇番佢咪下爬、嘟小咀,講對白的語氣和動作,不著力地讓你感到信繁慢慢由少年成長至人質年代的青年,九度山時的落泊大叔,再到大坂城就生猛晒,慢慢加咗啲為熟穩重落去,都咪話唔勁。

同埋,三谷叔叔《新選組》和呢套都無夾硬由小朋友年代開始,一嚟都係主角十幾歲時開始(咁,當年仲係二十代的香取和山本係皮光肉滑好多…)…都是一個反大河傳統。咁有童年都唔係問題,千萬唔好好似《江》咁叫野田妹廿幾歲人扮6歲咁可怕啫…

講番劇情,um,豐臣家係唔抵幫,自己唔審時度世,也唔明德川已升上乜level,好啦,俾你叫到班人返嚟幫手又唔知人地,一次又一次錯失良機,咁就係咁多,死咗都與人無猶,只係可惜田田啲家臣和仔為呢班豬隊友而喪失性命…雖然那個年代能有個身份唔係浪人咁死先係光榮,但真係…那班真係堅抽豬隊友囉….

最後,雅人叔自己訪問說,結局劇本最shock係佐助原來大過田田…哈哈哈,笑咗。

之所以睇《風林》和《天地人》都係為做功課既,不過就明白多好多pre田田年代啲恩恩怨怨,同埋,呢兩套啲劇情真係亂咁嚟到一個點,《真田田》比起過往的大河劇可能係笑位比較多,但劇情真係四平八穩,平衡史實(特別係信繁前半生其實無乜野好講,所以真田爸好多戲份)同八掛(忍者啦,so far都係得寺島叔叔幾個,同埋結局先出了一野的真田十勇士)方面好平均,老作得唔過份,笑位出現得嚟唔影響正經劇情推進,最緊要啲笑位唔係爛gag,真係笑得出先勁嘛﹗

多謝雅人叔和三谷叔叔,《真田田》陪我地過咗一個開心的2016年啦~~
**********************************************
其他真田田:
[日劇]真.《真田丸》
[日劇]春季新番
[日劇]春季新番~2

2 則留言:

  1. 妳返黎喇 XDDD 真田丸真係好好睇呀,大藏局個八婆同秀賴個廢柴真係激死人 >__<

    回覆刪除
    回覆
    1. 我返來啦﹗開學加上年尾公司超忙…想update吓都無心無力寫…哈
      秀賴係富二代啫,無實戰經驗俾人耍就一定…最嬲係大藏局同茶茶以為自己勁醒…想打爆佢地個頭…

      刪除

要講幾句嗎?﹗XD